معروف سوشل میڈیا شخصیت اور کانٹینٹ کریئیٹر ایمان فاطمہ نے انسٹاگرام پر 10 لاکھ (ایک ملین) فالوورز کا سنگِ میل عبور کرلیا ہے۔
یہ بھی پڑھیں: طلاق کے نوٹس کے بعد صلح کی کوشش، ایمان فاطمہ نے انسٹاگرام پر پوسٹ شیئر کردی
رجب بٹ سے علیحدگی کے بعد سوشل میڈیا پر دوبارہ متحرک ہونے والی ایمان فاطمہ نے اس بڑی کامیابی پر اپنے مداحوں کے نام ایک انتہائی جذباتی پیغام شیئر کیا ہے، جس میں انہوں نے اپنی زندگی کے مشکل ترین لمحات اور اس سفر میں ملنے والی حمایت کا تذکرہ کیا ہے۔ محض چند ماہ کے دوران ان کے فالوورز کی تعداد 6 لاکھ 91 ہزار سے بڑھ کر 10 لاکھ تک پہنچنا ان کے کیریئر کی ایک بڑی کامیابی قرار دی جارہی ہے۔
ایمان فاطمہ نے اپنے آفیشل اکاؤنٹ پر اس کامیابی کا جشن مناتے ہوئے لکھا کہ ’10 لاکھ فالوورز۔، یہ ایک ایسی عورت کی کہانی ہے جس کے پاس خواب تھے، ہمت تھی اور کبھی ہار نہ ماننے کی طاقت تھی۔‘
انہوں نے اعتراف کیا کہ یہ سفر ہرگز آسان نہیں تھا، لیکن ان کے بیٹے کی محبت، بھائی کی غیر متزلزل حمایت اور مداحوں کی بے لوث محبت نے انہیں ہر مشکل گھڑی میں ٹوٹنے سے بچائے رکھا۔ ایمان فاطمہ کے مطابق یہ نمبر صرف ایک ہندسہ نہیں ہے بلکہ یہ ان کی قربانیوں، محنت اور اللہ پر ان کے پختہ یقین کا منہ بولتا ثبوت ہے۔
یہ بھی پڑھیں: طلاق کے اعلان کے بعد رجب بٹ اور ایمان فاطمہ کے درمیان صلح ہوگئی؟ قریبی دوست کا اہم دعویٰ
اپنی پوسٹ میں ایمان فاطمہ نے ان تمام خواتین کو بھی مخاطب کیا جو اپنی زندگی میں خاموشی سے جدوجہد کر رہی ہیں۔ انہوں نے لکھا کہ ’خاموشی سے مشکلات کا مقابلہ کرنے والی ہر عورت کے لیے یہ کامیابی ایک پیغام ہے کہ وہ خود پر یقین رکھے۔
انہوں نے کہا کہ ہم اپنے خوف اور اپنی جدوجہد سے کہیں زیادہ طاقتور ہیں اور ہم کچھ بھی خوبصورت تخلیق کرنے کی صلاحیت رکھتی ہیں۔‘ انہوں نے اپنے خاندان اور مداحوں کا شکریہ ادا کرتے ہوئے کہا کہ ان کی موجودگی نے ہی انہیں آج اس مقام پر کھڑا کیا ہے۔
مداحوں کا ملا جلا ردعمل ایمان فاطمہ کی اس کامیابی پر سوشل میڈیا صارفین کی بڑی تعداد انہیں مبارکباد دے رہی ہے اور ان کی ہمت کو سراہا جا رہا ہے۔ بیشتر صارفین کا کہنا ہے کہ ایمان نے اپنی محنت اور وقار کے ذریعے عوام کے دلوں میں جگہ بنائی ہے۔
جہاں مداحوں کی بڑی تعداد خوشی کا اظہار کر رہی ہے، وہیں کچھ صارفین سوشل میڈیا پر یہ بحث بھی کررہے ہیں کہ ان کی شہرت کی بنیادی وجہ رجب بٹ کے ساتھ ان کا تعلق رہا۔ ان تنقیدی تبصروں کے باوجود ایمان فاطمہ اس وقت ایک کامیاب انفلوئنسر کے طور پر ابھری ہیں جو روزانہ کی بنیاد پر بڑے برانڈز کی تشہیر کر رہی ہیں اور ان کی مقبولیت میں مسلسل اضافہ ہورہا ہے۔
