پاکستان کرکٹ بورڈ نے کہا ہے کہ چیئرمین محسن نقوی کے آئندہ آئی سی سی اجلاسوں میں شرکت کے لیے بھارت جانے یا نہ جانے کا فیصلہ وزیراعظم شہباز شریف کریں گے۔ یہ پیشرفت ایسے وقت میں سامنے آئی ہے جب بین الاقوامی کرکٹ کونسل کی جانب سے محسن نقوی کو احمد آباد میں ہونے والے اجلاسوں میں شرکت کی دعوت دی گئی ہے۔
عرب نیوز کے مطابق پاکستان کرکٹ بورڈ کے ترجمان نے تصدیق کی ہے کہ آئی سی سی نے چیئرمین پی سی بی کو اجلاس میں شرکت کی دعوت دی ہے۔ ترجمان کے مطابق احمد آباد میں ہونے والے اجلاس میں شرکت کے لیے محسن نقوی کے دورۂ بھارت سے متعلق حتمی فیصلہ پی سی بی کے پیٹرن اِن چیف اور وزیراعظم شہباز شریف کریں گے۔
یہ بھی پڑھیں:پی سی بی چیئرمین محسن نقوی کو آئی سی سی اجلاس میں شرکت کی دعوت
رپورٹ کے مطابق محسن نقوی وفاقی کابینہ میں وزیر داخلہ کی ذمہ داریاں بھی انجام دے رہے ہیں، جس کے باعث اس دورے کو سیاسی اور سفارتی تناظر میں بھی اہم قرار دیا جا رہا ہے۔
پاکستان اور بھارت کے درمیان کشیدہ کرکٹ تعلقات کے باعث دونوں ممالک کے درمیان 2008 کے بعد کوئی دوطرفہ سیریز نہیں کھیلی گئی۔ حالیہ برسوں میں دونوں ٹیمیں صرف آئی سی سی یا ایشیائی مقابلوں میں نیوٹرل وینیوز پر آمنے سامنے آتی رہی ہیں۔
آئی سی سی چیمپئنز ٹرافی 2025 کے دوران بھی بھارت نے پاکستان کا دورہ کرنے سے انکار کیا تھا، جس کے بعد پاکستان اور بھارت کے درمیان میچز نیوٹرل مقام پر کرانے کا ہائبرڈ ماڈل اپنایا گیا تھا۔
یہ بھی پڑھیں:آئی سی سی اجلاس میں پاک بھارت دوطرفہ ٹی20 سیریز کی بات نہیں ہوئی، بھارتی میڈیا کا دعویٰ
میڈیا رپورٹس کے مطابق آئی سی سی کے آئندہ اجلاس 21 مئی سے آن لائن شروع ہوں گے، جبکہ 30 اور 31 مئی کو احمد آباد میں بالمشافہ اجلاس منعقد کیے جائیں گے۔ ان اجلاسوں میں ورلڈ ٹیسٹ چیمپئن شپ کے اگلے سائیکل، گورننس اور مالی معاملات پر غور متوقع ہے۔
اجلاس نرینڈر مودی اسٹیڈیم میں شیڈول ہیں، جہاں 2023 کرکٹ ورلڈ کپ کے اہم میچز اور فائنل بھی کھیلا گیا تھا۔
کچھ رپورٹس میں یہ بھی دعویٰ کیا گیا ہے کہ آئی سی سی مندوبین کو 31 مئی کو اسی مقام پر ہونے والے انڈین پریمیئر لیگ کے فائنل میں شرکت کی دعوت دی جا سکتی ہے، تاہم اس کی باضابطہ تصدیق نہیں ہوئی۔
