آئی ایم ایف کی تمام شرائط پوری کردیں معاہدہ اس ماہ ہوجائے گا، وزیراعظم

وزیراعظم پاکستان میاں محمد شہباز شریف کا کہنا ہے کہ آئی ایم ایف کی تمام شرائط پوری کردی ہیں اور امید ہے کہ اس کے ساتھ معاہدہ اس ماہ ہوجائے گا۔

کابینہ اجلاس سے خطاب کرتے ہوئے شہباز شریف نے کہا کہ آئی ایم ایف کے نویں جائزہ اجلاس کے بعد امید ہے کہ وہ اسٹاف لیول معاہدے کی منظوری دے دے گا۔

وزیر اعظم کا کہنا تھا کہ گزشتہ حکومت نے آئی ایم ایف معاہدے کی پاسداری نہیں کی اور اپنے ہی کیے گئے معاہدے کی دھجیاں بکھیر دیں۔

انہوں نے کہا کہ دوبارہ آئی ایم ایف کے ساتھ سرجوڑ کر بیٹھے ہیں اور کی تمام شرائط پوری کی ہیں تاہم اسٹاف لیول معاہدہ ابھی تک سائن نہیں ہوا۔ انہوں نے مزید کہا کہ اب معاملہ آئی ایم ایف بورڈ میں جائے گا اور امید ہے آئی ایم ایف 9 ویں معاہدے کی بورڈ سے منظور لے لی جائے گی۔

وزیراعظم نے یہ بھی بتایا کہ ’میری آئی ایم ایف کی ایم ڈی سے ایک گھنٹہ ٹیلی فون پر گفتگو ہوئی ہے اور اب کوئی ایسی چیز باقی نہیں جو آئی ایم ایف معاہدے میں رکاوٹ بنے‘۔

وزیراعظم نے کہا کہ آئی ایم ایف کے حوالے سے سعودی عرب اور یو اے ای نے ہمارا ہاتھ سنبھالا اور دونوں نے 3ارب ڈالر روپے کی مدد کی۔ انہوں نے مزید کہا کہ مارے دیرینہ دوست چین نے ہماری بھرپور مدد کی۔

انہوں نے بتایا کہ سیلاب سے ملک کو 30 ارب ڈالر کا نقصان ہوا اور متاثرین کی بحالی کے لیے حکومت نے 100 ارب روپے خرچ کیے۔

وزیراعظم نے ذرعی اور آئی ٹی شعبوں پر خاص توجہ دینے کی ضرورت پر زور دیتے ہوئے کہا کہ اس مرتبہ گندم کی بمپر فصل ہوئی جب کہ کپاس کی بھی فصل اچھی ہوگی۔

شہباز شریف کا کہنا تھا کہ پچھلی حکومت نے ملک کی معیشت کاجنازہ نکال دیا تھا۔ ان کا مزید کہنا تھا کہ سیاسی بحران اور دیگر چیلنجز کی وجہ سے معاشی ترقی نہیں ہوسکی۔ انہوں نے کہا کہ غریب آدمی ان حالات میں پس چکا ہے اگر اس کی تنخواہ میں اضافہ نہ کیا گیا تو اس کے لیے مشکلات مزید بڑھ جائیں گی لہٰذا ہماری کوشش ہے کہ اتنا اضافہ کیا جائے کہ لوگوں کا گزارا ہوسکے۔

شہباز شریف نے کہا کہ گیس کی دنیا بھر میں قیمتیں کم ہوئی ہیں اور حکومت کوشش کر رہی ہے کہ کسی ملک سے نیا معاہدہ ہوجائے تاکہ قیمت کم کرسکیں۔ انہوں نے کہا کہ بجلی بھی ایک بہت بڑا چیلنج ہے۔