جنوبی سوڈان کے شہر بینتیو میں شدید سیلابی خطرات کے باوجود قریباً 3 لاکھ افراد کی زندگیوں کو محفوظ رکھنے میں پاکستانی اور منگولین امن دستے اہم کردار ادا کر رہے ہیں۔
اقوام متحدہ کے امن مشن کے تحت تعینات یہ اہلکار مٹی کے حفاظتی بندوں کی نگرانی اور مضبوطی میں دن رات مصروف ہیں تاکہ دریائے نیل کے بڑھتے پانی کو آبادیوں میں داخل ہونے سے روکا جا سکے۔
مزید پڑھیں: یو این پیس مشن کے سربراہ کی پاکستانی امن دستے کی تعریف
بینتیو میں دنیا کا سب سے بڑا اندرونِ ملک بے گھر افراد کا کیمپ قائم ہے، جہاں ہزاروں خاندان پناہ لیے ہوئے ہیں۔ حالیہ برسوں میں موسمیاتی تبدیلیوں کے باعث جنوبی سوڈان شدید سیلابوں کی زد میں رہا ہے، جس سے کئی بستیاں مکمل طور پر پانی میں ڈوب چکی ہیں۔
ہر ہفتے منگولیا کے امن دستوں کی قیادت میں کشتیاں سیلابی پانیوں میں گشت کرتی ہیں، جبکہ پاکستانی انجینئر پانی کی سطح، پشتوں کی مضبوطی اور ممکنہ شگافوں کا جائزہ لیتے ہیں تاکہ کسی بھی خطرے کا بروقت پتا چلایا جا سکے۔
منگولین فوجی کمانڈر کرنل اردینے نوروو کے مطابق شہریوں کے تحفظ اور امدادی سرگرمیوں کو جاری رکھنا ان کی اولین ذمہ داری ہے، جبکہ پاکستانی انجینئرنگ دستے کے کمانڈر لیفٹیننٹ کرنل عثمان نے کہا کہ مسلسل نگرانی اور پیشگی اقدامات سیلابی خطرات سے نمٹنے کے لیے ناگزیر ہیں۔
مزید پڑھیں: پاکستانی دستوں کو غزہ بھیجنے کی خبروں پر پی ٹی آئی کی طرف سے تحفظات کا اظہار
پاکستانی انجینئرنگ کور مٹی کے حفاظتی پشتوں، رسد کے راستوں اور ہوائی پٹی کی حفاظت یقینی بنا رہی ہے تاکہ انسانی امداد متاثر نہ ہو۔ حکام کے مطابق معمولی سا شگاف بھی چند گھنٹوں میں بڑے پیمانے پر تباہی کا سبب بن سکتا ہے، اسی لیے نگرانی کا عمل مسلسل جاری رکھا جاتا ہے۔
مقامی آبادی کا کہنا ہے کہ نیلے ہیلمٹ پہننے والے یہ امن دستے ان کے لیے تحفظ اور امید کی علامت ہیں، کیونکہ انہی کوششوں کے باعث لاکھوں افراد سیلابی تباہی سے محفوظ ہیں۔
