پرتگال کے مائیہ ناز فٹ بالر کرسٹیانو رونالڈو 41 سال کی عمر میں اپنے کیریئر کا چھٹا ورلڈ کپ کھیلنے کے لیے تیار ہیں، جہاں وہ قومی ٹیم کی قیادت کریں گے۔
پرتگال کے ہیڈ کوچ رابرٹو مارٹینیز نے منگل کے روز ورلڈ کپ کے لیے 27 رکنی اسکواڈ کا اعلان کیا ہے، جس میں انہوں نے ایک علامتی ‘پلس ون’ کھلاڑی کا بھی اضافہ کیا ہے جو کہ گزشتہ سال انتقال کر جانے والے کھلاڑی ڈیوگو جوٹا کی یاد میں ہے۔
یہ بھی پڑھیں: کرسٹیانو رونالڈو کا جادو چل گیا، النصر کی مسلسل 14ویں فتح، نیا ریکارڈ قائم
کوچ مارٹینیز نے ٹیم کا اعلان کرتے ہوئے جذباتی انداز میں کہا کہ یہ اسکواڈ “27 کھلاڑیوں اور ایک پلس ون” پر مشتمل ہے۔ یہ ‘پلس ون’ لیورپول کے فارورڈ ڈیوگو جوٹا ہیں، جو جولائی 2025 میں 28 سال کی عمر میں ایک کار حادثے میں جان کی بازی ہار گئے تھے۔ کوچ کا کہنا تھا کہ ڈیوگو کا جذبہ اور مثال ہمیشہ ہماری ٹیم کے ساتھ رہے گی۔
اسکواڈ کی خاص بات یہ ہے کہ چوتھے نمبر کے گول کیپر ریکارڈو ویلہو بھی ٹیم کے ساتھ سفر کریں گے، تاہم فیفا کے قوانین کے مطابق آفیشل 26 کھلاڑیوں کی فہرست میں انہیں صرف اسی صورت شامل کیا جاسکے گا اگر پہلے سے رجسٹرڈ 3 گول کیپرز میں سے کوئی زخمی ہوجائے۔
یہ بھی پڑھیں: ریٹائرمنٹ کتنی دور ہے؟ کرسٹیانو رونالڈو نے اپنے ارادے بتا کر شائقین کو حیران کردیا
پرتگال کی ٹیم ورلڈ کپ سے قبل 6 جون کو چلی اور 10 جون کو نائیجیریا کے خلاف وارم اپ میچز کھیلے گی۔ فیفا کی ہدایات کے مطابق پرتگالی ٹیم کو اپنے پہلے میچ سے کم از کم 5 دن پہلے فلوریڈا (امریکہ) کے پام بیچ میں قائم تربیتی کیمپ میں پہنچنا ہوگا۔
واضح رہے کہ اس اسکواڈ میں شمولیت کے بعد کرسٹیانو رونالڈو دنیا کے پہلے فٹبالر بن گئے ہیں جنہیں ریکارڈ 6 ورلڈ کپ ٹورنامنٹس کے لیے طلب کیا گیا ہے۔
