پی سی بی پوڈکاسٹ کی 75ویں قسط میں پاکستان وائٹ بال ٹیم کے ہیڈ کوچ مائیک ہیسن نے خصوصی گفتگو کرتے ہوئے کہا ہے کہ ورلڈ کپ کو مدنظر رکھتے ہوئے ون ڈے انٹرنیشنل اسکواڈ کی تشکیل پر مسلسل کام جاری ہے۔
انہوں نے کہا کہ ہدف آئندہ ڈیڑھ سال میں بہترین ممکنہ ون ڈے ٹیم تیار کرنا ہے، جبکہ حالیہ وائٹ بال کیمپ نے نئے ٹیلنٹ کو جانچنے کا اہم موقع فراہم کیا ہے۔
یہ بھی پڑھیں:پاکستان ٹیم کے ہیڈ کوچ مائیک ہیسن کی لاہور میں کامیاب سرجری
مائیک ہیسن کے مطابق نوجوان کھلاڑیوں میں صلاحیت موجود ہے تاہم انہیں مزید وقت اور محنت درکار ہے، اور ان پر اعتماد کے ساتھ صبر کرنا بھی ضروری ہے۔
انہوں نے کہا کہ پاکستان کو ون ڈے کرکٹ میں مڈل اوورز میں بیٹنگ بہتر بنانے کی ضرورت ہے، جبکہ پاور پلے میں زیادہ وکٹیں حاصل کرنے اور بولنگ میں تسلسل لانے پر بھی توجہ دی جا رہی ہے۔
پاکستان وائٹ بال ہیڈ کوچ نے کہا کہ فٹنس میں بہتری سے ٹیم کی مجموعی کارکردگی مزید بہتر ہو سکتی ہے۔
یہ بھی پڑھیں:بابر اعظم کو نمیبیا کیخلاف بیٹنگ آرڈر میں نیچے کیوں بھیجا گیا؟ ہیڈ کوچ مائیک ہیسن نے بتا دیا
آسٹریلیا سیریز سے متعلق بات کرتے ہوئے مائیک ہیسن نے کہا کہ یہ نوجوان کھلاڑیوں کے لیے اپنی صلاحیتیں دکھانے کا بہترین موقع ہے، کیونکہ آسٹریلیا ایک مضبوط حریف ہے۔
انہوں نے کہا کہ پاکستان کے شائقین کرکٹ انتہائی پُرجوش ہیں اور ان کی حمایت ٹیم کے لیے بہت اہمیت رکھتی ہے۔
