بنگلہ دیش نے روہنگیا مہاجرین کے طویل بحران سے نمٹنے اور اقوام متحدہ کے امن مشنز میں تعاون بڑھانے کے لیے عالمی سطح پر مزید مؤثر کردار ادا کرنے کا مطالبہ کیا ہے۔
یہ مطالبہ بنگلہ دیش کے وزیر داخلہ صلاح الدین احمد اور بنگلہ دیش میں اقوام متحدہ کی ریزیڈنٹ کوآرڈینیٹر کیرول فلور-سمیریکزنیاک کے درمیان ڈھاکا میں ہونے والی ملاقات کے دوران سامنے آیا۔
یہ بھی پڑھیں:بنگلہ دیش میں مقیم روہنگیا کے باغی رہنما نبی حسین کا بھائی فائرنگ کے واقعے میں قتل
ملاقات میں ملک کی امن و امان کی صورتحال، روہنگیا انسانی بحران، اقوام متحدہ کے امن مشنز میں بنگلہ دیش پولیس کی بڑھتی شمولیت، پائیدار ترقیاتی اہداف اور تجارتی و سرمایہ کاری تعاون سمیت مختلف امور پر تبادلہ خیال کیا گیا۔
وزیر داخلہ صلاح الدین احمد نے اقوام متحدہ سے مطالبہ کیا کہ روہنگیا بحران سے نمٹنے کے لیے مزید مالی معاونت اور عالمی تعاون فراہم کیا جائے، کیونکہ موجودہ انسانی امدادی منصوبے زمینی ضروریات کے مقابلے میں ناکافی ہیں۔
انہوں نے کہا کہ بنگلہ دیش پرامن اور باوقار نقل مکانی پر یقین رکھتا ہے، تاہم میانمار سے بے دخل افراد کی طویل موجودگی اب قومی سلامتی کے لیے بھی چیلنج بنتی جا رہی ہے۔
یہ بھی پڑھیں:بنگلہ دیش میں روہنگیا پناہ گزینوں کی تعداد میں اضافہ، امدادی فنڈز میں نمایاں کمی سے بحران شدت اختیار کر گیا
اقوام متحدہ کی ریزیڈنٹ کوآرڈینیٹر نے روہنگیا مہاجرین کے لیے بنگلہ دیشی حکومت اور عوام کی فراخدلی کو سراہتے ہوئے کہا کہ اتنی بڑی تعداد میں مہاجرین کا بوجھ بنگلہ دیش اکیلا زیادہ عرصے تک برداشت نہیں کر سکتا، اس لیے عالمی برادری کو زیادہ مؤثر کردار ادا کرنا ہوگا۔
ملاقات کے اختتام پر بنگلہ دیش نے عالمی امن، سلامتی اور ہم آہنگی کے فروغ کے لیے اقوام متحدہ کے اقدامات میں مثبت تعاون جاری رکھنے کے عزم کا اعادہ کیا۔
