امریکا اور ایران کے درمیان جاری کشیدگی اور لڑائی کے خاتمے کے لیے امن معاہدے کو حتمی شکل دینے کا اعلان اتوار کی دوپہر تک متوقع ہے۔
امریکی اخبار دی واشنگٹن ٹائمز نے ذرائع کے حوالے سے رپورٹ کیا ہے کہ ہفتے کی صبح معاہدے کے مسودے پر اتفاق رائے ہوگیا تھا اور آئندہ 24 گھنٹوں کے دوران اس کا باضابطہ اعلان کیا جا سکتا ہے۔
مزید پڑھیں: امریکا اور ایران جنگ کے خاتمے کے لیے ممکنہ معاہدے کو حتمی شکل دینے کے قریب پہنچ چکے، ڈونلڈ ٹرمپ
رپورٹ کے مطابق مذاکرات میں ایرانی اسپیکر محمد باقر قالیباف، جے ڈی وینس، اسٹیو وٹکوف اور جیرڈ کشنر شامل تھے، جنہوں نے امن معاہدے کے ابتدائی مسودے کی منظوری دے دی ہے۔
بتایا گیا ہے کہ حتمی منظوری کے لیے دستاویز دونوں ممالک کی اعلیٰ قیادت کو ارسال کردی گئی ہے۔
اگر یہ معاہدہ کامیاب ہو جاتا ہے تو گزشتہ 6 ہفتوں سے جاری جنگ بندی مستقل امن کی شکل اختیار کر سکتی ہے، تاہم ڈونلڈ ٹرمپ اس بات کا عندیہ دے چکے ہیں کہ مستقبل میں نئے حملوں کا امکان مکمل طور پر مسترد نہیں کیا جا سکتا۔
اخبار کے مطابق مجوزہ جنگ بندی معاہدے کی مکمل تفصیلات ابھی سامنے نہیں آئیں، جبکہ ایران کے جوہری پروگرام کے مستقبل اور پابندیوں میں نرمی جیسے اہم تنازعاتی نکات تاحال زیر بحث ہیں۔
اس کے علاوہ دونوں ممالک کو آبنائے ہرمز کو دوبارہ کھولنے کے طریقہ کار پر بھی اتفاق کرنا ہوگا۔
قبل ازیں ڈونلڈ ٹرمپ نے کہاکہ امریکا اور ایران کے مذاکرات کار جنگ کے خاتمے کے لیے ایک ممکنہ معاہدے کے حتمی مرحلے کے کافی قریب پہنچ چکے ہیں۔
امریکی نشریاتی ادارے سی بی ایس نیوز کو دیے گئے انٹرویو میں ڈونلڈ ٹرمپ نے کہاکہ زیر غور معاہدہ ایران کو جوہری ہتھیار حاصل کرنے سے روکنے کے ساتھ ساتھ افزودہ یورینیم کے معاملے کو بھی اطمینان بخش انداز میں حل کرے گا۔
ایک اور انٹرویو میں امریکی صدر ڈونلڈ ٹرمپ نے کہاکہ ایران سے متعلق ممکنہ جنگ کے حوالے سے وہ اتوار تک کوئی فیصلہ کر سکتے ہیں۔
ڈونلڈ ٹرمپ نے کہاکہ امریکا ایران کے ساتھ یا تو ایک اچھی ڈیل کرے گا یا پھر اسے مکمل طور پر تباہ کر دے گا۔
واضح رہے کہ پاکستان امریکا اور ایران کے درمیان معاہدے کے لیے بھرپور سفارتکاری کررہا ہے، اور اسی سلسلے میں فیلڈ مارشل سید عاصم منیر نے ایران کا سرکاری دورہ بھی کیا ہے۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر کا دورہ 8 اپریل 2026 کی امریکا ایران جنگ بندی کے بعد خطے میں جاری کشیدگی کے تناظر میں کشیدگی کم کرنے اور تعمیری رابطوں کے فروغ کے لیے جاری ثالثی کوششوں کا حصہ تھا۔
مزید پڑھیں: فیلڈ مارشل عاصم منیر کی ایران میں اہم ملاقاتیں، امریکا ایران مفاہمت کی جانب مثبت پیشرفت
آئی ایس پی آر کے مطابق گزشتہ 24 گھنٹوں کے دوران ہونے والے تفصیلی مذاکرات کے نتیجے میں حتمی مفاہمت کی جانب حوصلہ افزا پیش رفت سامنے آئی ہے۔
