سعودی عرب نے حج 2026 کے دوران حجاج کی مؤثر اور محفوظ نقل و حمل کے لیے اپنے اسمارٹ ٹرانسپورٹ اور موبلٹی نظام کو مزید وسعت دے دی ہے۔ عرب نیوز کی رپورٹ کے مطابق حکام نے مکہ مکرمہ اور مقدس مقامات کے درمیان لاکھوں حجاج کی آمد و رفت کو آسان بنانے کے لیے ہائی کیپیسٹی ریل، شٹل بس اور جدید ٹریفک مینجمنٹ سسٹمز کو فعال کر دیا ہے۔
یہ بھی پڑھیں:1800 سے زیادہ علما عازمین حج کی رہنمائی پر مامور، ڈیجیٹل اور فیلڈ سسٹم بھی فعال
عرب نیوز کے مطابق اس آپریشن کا مرکزی حصہ المشاعر المقدسہ میٹرو ہے جو مکہ، منیٰ، مزدلفہ اور عرفات کے درمیان چلتی ہے اور حج کے دوران 20 لاکھ سے زائد مسافروں کو منتقل کرنے کی صلاحیت رکھتی ہے۔ یہ مکمل طور پر برقی نظام پر مبنی میٹرو ہے جو نہ صرف ٹریفک دباؤ کم کرتی ہے بلکہ کاربن اخراج میں بھی نمایاں کمی کا باعث بنتی ہے۔
#SaudiArabia is deploying one of the world’s highest-capacity transport systems for #Hajj2026, with the Al-Mashaaer Metro preparing to move more than 2 million pilgrims between Mina, Muzdalifah and Arafat. https://t.co/TW7xroL387 pic.twitter.com/GhE29Dsj35
— Arab News (@arabnews) May 24, 2026
18 کلومیٹر طویل اس ریلوے نیٹ ورک میں 9 اسٹیشنز شامل ہیں جبکہ 17 ٹرینیں چلائی جاتی ہیں، ہر ٹرین میں تقریباً 3 ہزار مسافر سفر کر سکتے ہیں۔ یہ نظام ایک گھنٹے میں تقریباً 72 ہزار افراد کو منتقل کرنے کی صلاحیت رکھتا ہے اور 2010 سے حج سیزن کے دوران خدمات فراہم کر رہا ہے۔
یہ بھی پڑھیں:مدینہ منورہ میں بسوں اور ٹرینوں کے ذریعے آنے والے عازمینِ حج کے استقبال کی تیاریاں مکمل
رپورٹ میں بتایا گیا ہے کہ سعودی جنرل اتھارٹی برائے روڈز نے مکہ مکرمہ میں داخل ہونے والی بڑی شاہراہوں پر ٹریفک کی نگرانی اور انتظام کو مزید سخت کر دیا ہے تاکہ حجاج کی آمد کے دوران روانی برقرار رکھی جا سکے۔
عرب نیوز کے مطابق مدینہ منورہ میں بھی ’مدینہ بس‘ منصوبے کے تحت خصوصی شٹل سروسز چلائی جا رہی ہیں جو مسجد نبوی اور مسجد قبا کے درمیان زائرین کی آمد و رفت کو آسان بناتی ہیں۔ یہ سروسز یوم عرفہ سے شروع ہو کر عید الاضحیٰ کے پہلے دن تک جاری رہیں گی۔
سعودی حکام کے مطابق حج کے دوران نقل و حمل، سکیورٹی اور بھیڑ کے انتظام کے تمام شعبوں میں جدید ٹیکنالوجی اور مربوط حکمت عملی کے ذریعے انتظامات کو مزید بہتر بنایا گیا ہے تاکہ لاکھوں عازمین حج کو سہولت فراہم کی جا سکے۔
