پاکستان اور سعودی عرب سمیت دیگر اسلامی ممالک نے مقبوضہ یروشلم میں نام نہاد صومالی لینڈ کے سفارتخانے کے افتتاح کی شدید مذمت کی ہے۔
ترجمان دفتر خارجہ کے مطابق پاکستان، سعودی عرب، قطر، مصر، اردن، لبنان، ترکیہ، انڈونیشیا، جبوتی، صومالیہ، فلسطین، عمان، سوڈان اور یمن کے وزرائے خارجہ نے مقبوضہ بیت المقدس میں نام نہاد صومالی لینڈ کے سفارت خانے کے افتتاح کی شدید الفاظ میں مذمت کی ہے۔
🔊PR No.1️⃣2️⃣6️⃣/2️⃣0️⃣2️⃣6️⃣
Joint Ministerial Statement Condemning the Opening of a Purported “Somaliland” Embassy in Occupied Jerusalem
🔗⬇️ pic.twitter.com/XSXDeA7oZ1
— Ministry of Foreign Affairs – Pakistan (@ForeignOfficePk) May 24, 2026
مشترکہ وزارتی بیان میں کہا گیا ہے کہ یہ اقدام بین الاقوامی قانون اور متعلقہ بین الاقوامی قراردادوں کی صریح خلاف ورزی ہے اور مقبوضہ یروشلم کی قانونی اور تاریخی حیثیت پر براہِ راست حملہ تصور کیا جاتا ہے۔
وزرائے خارجہ نے مقبوضہ بیت المقدس میں غیر قانونی حقائق مسلط کرنے یا بین الاقوامی قانون اور اقوام متحدہ کی متعلقہ قراردادوں کے منافی کسی بھی ادارے یا انتظام کو جواز فراہم کرنے کے لیے کیے جانے والے یکطرفہ اقدامات کو مکمل طور پر مسترد کرنے کا اعادہ کیا۔
بیان میں اس بات کو دہرایا گیا کہ مشرقی یروشلم 1967 سے مقبوضہ فلسطینی علاقہ ہے، اور اس کی قانونی و تاریخی حیثیت تبدیل کرنے کے لیے کیے جانے والے تمام اقدامات کالعدم، غیر مؤثر اور قانونی حیثیت سے محروم ہیں۔
وزرائے خارجہ نے وفاقی جمہوریہ صومالیہ کی وحدت، خودمختاری اور علاقائی سالمیت کے لیے اپنی مکمل حمایت کا اعادہ کرتے ہوئے صومالی سرزمین کی وحدت کو نقصان پہنچانے یا اس کی خودمختاری کی خلاف ورزی کرنے والے کسی بھی یکطرفہ اقدام کو دوٹوک انداز میں مسترد کیا۔
واضح رہے کہ کچھ عرصہ قبل اسرائیل نے متنازع صومالی لینڈ کو ریاست کے طور پر تسلیم کرنے کا اعلان کیا تھا، جسے اسلامی ممالک کی جانب سے مسترد کیا گیا تھا۔
