مری کی ضلعی انتظامیہ نے عیدالاضحیٰ کے موقع پر متوقع سیاحوں کے بڑے رش کے پیش نظر خصوصی انتظامات کو حتمی شکل دے دی ہے۔
حکام کے مطابق عید کی تعطیلات کے دوران امن و امان برقرار رکھنے، ٹریفک کی روانی بہتر بنانے اور کسی بھی ناخوشگوار واقعے سے بچنے کیلئے مری بھر میں دفعہ 144 نافذ کر دی گئی ہے۔
یہ بھی پڑھیں: دفتر چھوڑیں اور فیلڈ میں آئیں، وزیرِ اعلیٰ مریم نواز کا عید الاضحیٰ پر افسران کو فرنٹ لائن پر رہنے کا سخت حکم
سیاحوں کی سہولت کے لیے شہر کے مختلف مقامات پر خصوصی سہولت سینٹرز بھی قائم کیے گئے ہیں، جہاں مسافروں کو رہنمائی اور سفری معاونت فراہم کی جائے گی۔
انتظامیہ نے اعلان کیا ہے کہ ٹریفک کی روانی برقرار رکھنے اور اہم شاہراہوں و سیاحتی مقامات پر رش کم کرنے کے لیے مری میں 200 سے زائد ٹریفک وارڈنز تعینات کیے جائیں گے۔
عید انتظامات کے تحت مال روڈ پر بیچلر سیاحوں کے داخلے پر بھی پابندی عائد کر دی گئی ہے تاکہ خاندانوں کے لیے زیادہ محفوظ اور دوستانہ ماحول یقینی بنایا جا سکے۔
حکام نے سیاحوں سے اپیل کی ہے کہ وہ انتظامیہ سے تعاون کریں، ٹریفک ہدایات پر عمل کریں اور حفاظتی تدابیر اختیار کریں تاکہ عید کی تعطیلات خوشگوار اور پرسکون انداز میں گزریں۔
