اداکار اور فلم ساز شمعون عباسی نے کراچی کی مبینہ منشیات فروش انمول عرف پنکی کی زندگی پر مبنی مجوزہ ڈراما سیریل کی مخالفت کرتے ہوئے کہا ہے کہ ایسی کہانی ٹی وی اسکرین کے لیے موزوں نہیں۔
یہ بھی پڑھیں: انمول پنکی نے کن شخصیات کے خلاف بیانات دیے؟ وکیل نے ملاقات کی تفصیلات بتا دیں
شمعون عباسی نے پیر کے روز فیس بک پر جاری اپنے بیان میں سوال اٹھایا کہ آخر ایسی کہانی کو ڈرامائی تشیکل دینے کی ضرورت کیوں پیش آ رہی ہے جب کہ خواتین کی جدوجہد، کامیابی اور حوصلہ افزائی پر مبنی کئی مثبت کہانیاں موجود ہیں جنہیں ٹی وی پر پیش کیا جا سکتا ہے۔
انہوں نے ان اطلاعات پر بھی ردعمل دیا جن کے مطابق اداکارہ صبا قمر کو اس منصوبے میں مرکزی کردار کے لیے منتخب کیا جا رہا ہے۔
شمعون عباسی نے کہا کہ صبا قمر اپنی شاندار اداکاری کے باعث اس کردار کو اس انداز سے نبھا سکتی ہیں کہ ناظرین کردار سے متاثر ہو جائیں۔
انہوں نے صبا قمر کے سابقہ ڈرامے کیس نمبر 9 کو ایک بہترین ڈراما قرار دیتے ہوئے کہا کہ اس نے معاشرے پر مثبت اثرات مرتب کیے اور ہراسانی جیسے حساس مسئلے پر شعور اجاگر کیا۔
مزید پڑھیے: ’مجھے لاہور سے گرفتار کرکے یہاں لائے ہیں‘، انمول پنکی کی عدالت میں دہائی
شمعون عباسی نے سوال کیا کہ جب ایک اداکارہ اتنے مثبت اور مؤثر کردار ادا کر سکتی ہے تو پھر اسے ایک منفی کردار کو مقبول بنانے کے لیے کیوں استعمال کیا جا رہا ہے۔
انہوں نے کہا کہ اگر اس کہانی کو بیان کرنا ہی مقصود ہے تو اسے فلم کی صورت میں پیش کیا جانا چاہیے کیونکہ سنیما دیکھنے کا انتخاب ناظرین اپنی مرضی سے کرتے ہیں جب کہ ٹی وی ڈرامے گھروں میں ہر عمر کے افراد خصوصاً نوجوان لڑکیوں کی دسترس میں ہوتے ہیں۔
ان کا کہنا تھا کہ کسی مجرم کی کہانی کو گھر گھر پہنچانا ایک حساس معاملہ ہے اور اس میں احتیاط برتنا ضروری ہے۔
Pakistani actress Saba Qamar will reportedly take on the role of suspected drug dealer Anmol, widely known as Pinky, in an upcoming television biopic drama currently in development.
Details: https://t.co/Lh7HfAf1jb#TheCurrent #LatestNews
— The Current (@TheCurrentPK) June 1, 2026
شمعون عباسی نے اس منصوبے کو وائرل ہونے والے ایک واقعے سے فائدہ اٹھانے کی کوشش قرار دیتے ہوئے کہا کہ وہ اس منصوبے کے پس پردہ موجود افراد کو جانتے ہیں تاہم سچ بولنے سے انہیں کوئی ہچکچاہٹ نہیں۔
واضح رہے کہ اطلاعات کے مطابق سیونتھ اسکائی پروڈکشنز کراچی کی مبینہ ڈرگ کوئین انمول عرف پنکی کی زندگی پر مبنی بایوگرافیکل ڈرامہ تیار کر رہی ہے جس کا اسکرپٹ مبینہ طور پر کیس نمبر 9 کے مصنف شاہ زیب خانزادہ تحریر کریں گے۔
مزید پڑھیں: کراچی: منشیات فروش انمول پنکی کے جسمانی ریمانڈ میں مزید 4 دن کی توسیع
پاکستان میں حقیقی جرائم پر مبنی تفریحی مواد ماضی میں بھی تنازع کا باعث بنتا رہا ہے۔ چند برس قبل فلم ’جاوید اقبال: دی اَن ٹولڈ اسٹوری آف اے سیریل کلر‘ کو سنیما گھروں میں نمائش کی اجازت نہیں دی گئی تھی تاہم یہ فلم بعد میں یوٹیوب پر ریلیز کی گئی۔
