سعودی عرب کی قیادت نے حج سیزن کے کامیاب انعقاد پر وزیر داخلہ شہزادہ عبدالعزیز بن سعود بن نائف اور متعلقہ اداروں کو مبارکباد پیش کی ہے۔ شاہ سلمان بن عبدالعزیز اور ولی عہد شہزادہ محمد بن سلمان نے اپنے الگ الگ پیغامات میں حج انتظامات کو مثالی قرار دیتے ہوئے عازمین کو فراہم کی جانے والی سہولیات اور سکیورٹی اقدامات کو سراہا۔
سعودی ذرائع ابلاغ کے مطابق شاہ سلمان بن عبدالعزیز آل سعود اور محمد بن سلمان نے منگل کے روز وزیر داخلہ کو الگ الگ تہنیتی پیغامات ارسال کیے، جن میں حج سیزن کی کامیاب تکمیل پر مبارکباد دی گئی۔
اپنے پیغامات میں سعودی قیادت نے ان تمام سکیورٹی اور سول اداروں کی خدمات کو سراہا جن کی کاوشوں کے باعث 17 لاکھ 7 ہزار 301 عازمینِ حج نے اطمینان، سہولت اور تحفظ کے ماحول میں اپنے مذہبی فریضے کی ادائیگی کی۔
شہزادہ عبدالعزیز بن سعود بن نائف سپریم حج کمیٹی کے سربراہ ہیں، جو حج کے دوران عازمین کے لیے سیکیورٹی، انتظامی اور خدماتی منصوبوں کی نگرانی اور عمل درآمد کی ذمہ دار ہے۔
رپورٹ کے مطابق متعلقہ اداروں کی مربوط کوششوں کے نتیجے میں خطے کو درپیش مختلف چیلنجز کے باوجود حج ایسے ماحول میں منعقد ہوا جہاں روحانیت، سکون، امن اور مذہبی جذبے کو بھرپور فروغ ملا۔
سعودی قیادت نے اس بات پر اطمینان کا اظہار کیا کہ حج انتظامات کے دوران عازمین کو بہترین سہولیات فراہم کی گئیں اور تمام مراحل خوش اسلوبی سے مکمل ہوئے۔
واضح رہے کہ حج اسلام کے 5 بنیادی ارکان میں شامل ہے اور ہر صاحبِ استطاعت مسلمان پر زندگی میں کم از کم ایک بار مکہ اور مدینہ کی زیارت اور حج کی ادائیگی فرض ہے۔
