بھارتی گلوکار گرو رندھاوا کے فٹنس سینٹر سے منسلک ایک جمخانے پر نامعلوم افراد نے فائرنگ کردی، جس کی ذمہ داری مبینہ طور پر لارنس بشنوئی گینگ نے قبول کرلی ہے۔
بھارتی میڈیا کے مطابق 10 جون کو دہلی کے علاقے پشچم وہار میں واقع گرو رندھاوا کے فٹنس مرکز کے ورزش خانے پر 2 موٹرسائیکل سوار افراد نے فائرنگ کی۔ حملہ آوروں نے اپنے چہرے ڈھانپ رکھے تھے اور واردات کے بعد فرار ہوگئے، تاہم واقعے میں کوئی جانی نقصان نہیں ہوا۔
یہ بھی پڑھیں: سلمان خان کے گھر پر فائرنگ، منصوبہ بندی کہاں ہوئی، تفصیلات سامنے آ گئیں
سوشل میڈیا پر جاری ایک پیغام میں گینگ کے مبینہ رکن انیل پنڈت نے دعویٰ کیا کہ گرو رندھاوا کے ورزش خانے کو سلمان خان سے بڑھتی قربت کے باعث نشانہ بنایا گیا۔ پیغام میں مزید حملوں کی دھمکی بھی دی گئی، تاہم پولیس ان دعوؤں کی تصدیق کررہی ہے۔
پولیس کے مطابق واقعے کی تحقیقات شروع کردی گئی ہیں اور جائے وقوعہ سے شواہد اکٹھے کیے جارہے ہیں۔ حکام کا کہنا ہے کہ حملے کے محرکات اور ذمہ داروں کا تعین تفتیش مکمل ہونے کے بعد کیا جائے گا۔
یہ بھی پڑھیں: سلمان خان کے گھر پر فائرنگ میں ملوث 2 ملزمان گرفتار، واقعہ کی تفصیلات سامنے آگئیں
یاد رہے کہ سلمان خان اور لارنس بشنوئی گینگ کے درمیان تنازع 1998 میں کالے ہرن کے شکار کے مقدمے کے بعد سامنے آیا تھا۔ گینگ ماضی میں متعدد بار سلمان خان اور ان سے وابستہ شخصیات کو دھمکیاں دے چکا ہے، جبکہ پنجابی گلوکار سدھو موسے والا کے قتل سمیت کئی نمایاں واقعات میں بھی اس گینگ کا نام سامنے آتا رہا ہے۔
