بجٹ 27-2026: تنخواہ پر ریلیف، اب آپ کا کتنا ٹیکس کٹے گا، جانیے اس خبر میں!

حکومتِ پاکستان نے بجٹ 2026-27 میں تنخواہ دار طبقے کو ریلیف دینے کے لیے انکم ٹیکس کی 4 سلیبز میں شرحِ ٹیکس کم کرنے اور سرچارج مکمل طور پر ختم کرنے کی تجویز دی ہے۔

وفاقی وزیر خزانہ محمد اورنگزیب نے قومی اسمبلی میں بجٹ پیش کرتے ہوئے بتایا کہ گزشتہ مالی سال میں سرچارج کو 10 فیصد سے کم کرکے 9 فیصد کیا گیا تھا، جبکہ نئے مالی سال کے لیے اسے مکمل طور پر ختم کرنے کی تجویز دی گئی ہے۔

یہ بھی پڑھیں:بجٹ 27-2026: فری لانسرز اور آئی ٹی برآمد کنندگان کے لیے ٹیکس رعایت میں توسیع؟

فنانس بل 27-2026 کے مطابق تنخواہ دار افراد کے لیے انکم ٹیکس کے ڈھانچے میں تبدیلی کی گئی ہے۔ گزشتہ سال کے بجٹ میں 6 سلیبز موجود تھیں، تاہم اب انہیں بڑھا کر 8 سلیبز کر دیا گیا ہے، جن پر مختلف شرحوں کے مطابق ٹیکس عائد ہوگا۔

نئی ٹیکس سلیبز سالانہ آمدن کی بنیاد پر مقرر کی گئی ہیں، جن میں 6 لاکھ روپے تک، 6 لاکھ سے 12 لاکھ، 12 لاکھ سے 22 لاکھ، 22 لاکھ سے 32 لاکھ، 32 لاکھ سے 41 لاکھ، 41 لاکھ سے 56 لاکھ، 56 لاکھ سے 70 لاکھ اور 70 لاکھ روپے سے زیادہ سالانہ آمدن حاصل کرنے والے افراد شامل ہیں۔

حکومت کا کہنا ہے کہ ان تبدیلیوں کا مقصد مہنگائی اور بڑھتے ہوئے مالی دباؤ کے تناظر میں تنخواہ دار طبقے کو ریلیف فراہم کرنا ہے۔

آپ کی تنخواہ پر کتنا ٹیکس بنے گا؟

اگر آپ جاننا چاہتے ہیں کہ بجٹ 27-2026 کی مجوزہ ٹیکس شرحوں کے تحت آپ کی ماہانہ یا سالانہ تنخواہ پر کتنا انکم ٹیکس لاگو ہوگا تو نیچے موجود کلکولیٹر میں اپنی تنخواہ درج کریں۔ کلکولیٹر آپ کو قابلِ ٹیکس آمدن، متعلقہ ٹیکس سلیب اور سالانہ و ماہانہ ٹیکس کی متوقع رقم فوری طور پر بتائے گا۔

کلکولیٹر استعمال کرنے کا طریقہ

اپنی ماہانہ یا سالانہ تنخواہ درج کریں۔

کلکولیٹر خودکار طور پر متعلقہ ٹیکس سلیب منتخب کرے گا۔

آپ کو سالانہ واجب الادا ٹیکس اور ماہانہ کٹوتی کی تفصیل مل جائے گی۔

حساب کتاب بجٹ 27-2026 میں تجویز کردہ ٹیکس شرحوں کے مطابق ہوگا۔