شمالی وزیرستان کے علاقے میران شاہ اور گرد و نواح میں سیکیورٹی فورسز کی انٹیلی جنس بیسڈ کارروائیوں کے دوران گزشتہ 72 گھنٹوں میں مزید 21 دہشتگرد ہلاک کر دیے گئے ہیں۔
یہ بھی پڑھیں:ضلع کرک میں پولیس پر ’فتنہ الخوارج ‘ کا ڈرون حملہ، 9 جوان زخمی
آئی ایس پی آر کے مطابق ہلاک ہونے والے دہشتگردوں کا تعلق بھارتی حمایت یافتہ فتنہ الخوارج سے تھا، جن میں چار اہم کمانڈر بھی شامل ہیں جن کی شناخت خوارجی خالد رضا (عرف سالار)، خوارجی مفتون، خوارجی موسیٰ اور خوارجی عمران (عرف ایان) کے نام سے ہوئی ہے۔ یہ عناصر متعدد دہشتگرد کارروائیوں، سیکیورٹی اہلکاروں اور عام شہریوں کے قتل میں مطلوب تھے۔
بیان کے مطابق گزشتہ 3 روز کے دوران ہونے والی ٹارگٹڈ کارروائیوں میں مجموعی طور پر 48 خوارج کو ہلاک کیا جا چکا ہے، جسے سیکیورٹی فورسز نے علاقے میں دہشتگرد نیٹ ورک کے لیے بڑا دھچکا قرار دیا ہے۔
آئی ایس پی آر نے مزید بتایا کہ کارروائیوں کے دوران ہلاک دہشتگردوں کے قبضے سے اسلحہ اور گولہ بارود بھی برآمد کیا گیا ہے، جبکہ یہ عناصر علاقے میں دہشتگرد سرگرمیوں میں سرگرم رہے ہیں۔
یہ بھی پڑھیں:پاکستان دشمن گٹھ جوڑ بے نقاب، فتنہ الخوارج، بھارت اور کالعدم ایکشن کمیٹی کے روابط کے شواہد سامنے آگئے
بیان میں کہا گیا ہے کہ علاقے میں کلیئرنس اور سینیٹائزیشن آپریشنز جاری رہیں گے تاکہ باقی ماندہ خوارج کو بھی ختم کیا جا سکے۔ سیکیورٹی فورسز اور قانون نافذ کرنے والے ادارے قومی انسداد دہشتگردی حکمت عملی “عزمِ استحکام” کے تحت ملک سے دہشتگردی کے مکمل خاتمے کے لیے پرعزم ہیں۔
