سندھ کابینہ نے مالی سال 27-2026 کے صوبائی بجٹ کی منظوری دے دی، جس کا مجموعی حجم 2.7 ٹریلین روپے سے زائد ہونے کا امکان ہے۔
ذرائع کے مطابق بجٹ میں سرکاری ملازمین کی تنخواہوں میں 7 فیصد جبکہ پینشن میں 5 فیصد اضافے کی تجویز شامل کی گئی ہے۔
کابینہ اجلاس کے دوران حکام نے بتایا کہ حکومت کی خواہش تھی کہ ملازمین کی تنخواہوں میں کم از کم 10 فیصد اضافہ کیا جائے، تاہم مالی وسائل اور بجٹ کی موجودہ صورتحال کے باعث اس سے زیادہ ریلیف دینا ممکن نہیں ہو سکا۔
یہ بھی پڑھیں: عالمی بحران کے دوران عوام کے لیے ریلیف، سندھ حکومت نے سبسڈی پروگرام کی تفصیلات جاری کردیں
اجلاس میں آئندہ مالی سال کے ترقیاتی اور فلاحی منصوبوں سمیت مختلف شعبوں کے لیے مالی ترجیحات کا جائزہ لیا گیا اور بجٹ تجاویز کی منظوری دی گئی۔
اس موقع پر وزیراعلیٰ سندھ مراد علی شاہ نے کہا کہ نئے مالی سال کے بجٹ میں معاشرے کے تمام طبقات کی ضروریات کو مدنظر رکھا گیا ہے۔
انہوں نے کہا کہ سندھ حکومت بلاول بھٹو زرداری کی ہدایات کی روشنی میں غربت کے خاتمے، عوامی فلاح اور کم آمدن والے طبقات کو ریلیف فراہم کرنے کے لیے خصوصی اقدامات کر رہی ہے۔
وزیراعلیٰ کا کہنا تھا کہ بجٹ میں ترقیاتی منصوبوں کے ساتھ ساتھ عوامی بہبود اور سماجی تحفظ کے پروگراموں پر بھی خصوصی توجہ دی گئی ہے تاکہ معاشی چیلنجز کے باوجود عوام کو زیادہ سے زیادہ سہولتیں فراہم کی جا سکیں۔
