اسلام آباد پولیس نے محرم الحرام کے دوران امن و امان کے قیام اور فول پروف سیکیورٹی انتظامات کو یقینی بنانے کے لیے تیاریاں مزید تیز کردی ہیں۔
اس سلسلے میں ایس ایس پی آپریشنز اسلام آباد قاضی علی رضا نے ایس ایس پی سیکیورٹی آپریشنز سلیمان ظفر اور دیگر افسران کے ہمراہ مختلف امام بارگاہوں اور جلوسوں کے روٹس کا دورہ کیا۔
مزید پڑھیں: محرم الحرام میں بین المسالک ہم آہنگی اور امن کے فروغ کے لیے علمائے کرام متفقہ ضابطۂ اخلاق پر متفق
اس موقع پر متعلقہ ایس ایچ اوز اور دیگر پولیس افسران بھی ان کے ہمراہ موجود تھے۔
دورے کے دوران ایس ایس پی آپریشنز نے امام بارگاہوں میں کیے گئے سیکیورٹی انتظامات اور جلوسوں کے لیے مقررہ روٹس کا تفصیلی جائزہ لیا۔
انہوں نے افسران کو ہدایت کی کہ محرم الحرام کے دوران جلوسوں اور مجالس کے لیے فول پروف سکیورٹی انتظامات کو ہر صورت یقینی بنایا جائے۔
قاضی علی رضا نے اس موقع پر کہاکہ تمام سیکیورٹی ایس او پیز پر من و عن عملدرآمد کو یقینی بنایا جائے تاکہ عزاداروں کو محفوظ ماحول فراہم کیا جا سکے۔
انہوں نے کہاکہ اسلام آباد پولیس محرم الحرام کے دوران فول پروف سکیورٹی انتظامات کے لیے پُرعزم ہے اور اس مقصد کے لیے تمام دستیاب وسائل بروئے کار لائے جا رہے ہیں۔
ایس ایس پی آپریشنز نے مزید کہاکہ محرم الحرام کے دوران بین المسالک ہم آہنگی، بھائی چارے اور رواداری کے فروغ کے لیے بھی تمام ضروری اقدامات کیے جا رہے ہیں۔
مزید پڑھیں: محرم الحرام کا چاند نظر نہیں آیا، یوم عاشور 26 جون بروز جمعہ کو ہوگا
انہوں نے اس عزم کا اظہار کیاکہ انسپکٹر جنرل اسلام آباد کے وژن کے مطابق محرم الحرام کے موقع پر وفاقی دارالحکومت میں امن و امان کی فضا ہر صورت برقرار رکھی جائے گی۔
