امریکی نائب صدر جے ڈی وینس نے ایک انتہائی اہم بیان میں تصدیق کی ہے کہ قطری اور پاکستانی ثالث کاروں کی انتھک کوششوں کے نتیجے میں امریکا اور ایران کے مابین ایک ’تاریخی مفاہمتی یادداشت‘ طے پاگئی ہے۔
امریکی میڈیا سے گفتگو کرتے ہوئے نائب صدر کا کہنا تھا کہ ہم امریکی عوام کو امریکا ایران مفاہمتی یادداشت کی تمام تر تفصیلات سے فوری آگاہ کرنا چاہتے ہیں، تاہم قطری اور پاکستانی ثالث کاروں نے اس معاہدے کا مکمل متن ابھی جاری نہ کرنے کا کہا ہے تاکہ حتمی مراحلہ پرامن طریقے سے طے ہو سکیں۔
‘جمعے کے روز’ تفصیلات سامنے لانے کا اعلان
امریکی نائب صدر جے ڈی وینس نے اپنے انٹرویو میں مزید کہا کہ عوام کو زیادہ انتظار نہیں کرنا پڑے گا اور اس معاہدے کی تمام تر تفصیلات ‘آنے والے جمعے کو’ باضابطہ طور پر دنیا کے سامنے آ جائیں گی۔
یہ بھی پڑھیں:ایران امریکا معاہدہ: تیل کی قیمتوں میں مسلسل کمی، مارکیٹ کو آبنائے ہرمز کی بحالی کا انتظار
انہوں نے امریکی عوام کو یقین دہانی کرواتے ہوئے کہا کہ ’یہ معاہدہ امریکی عوام کے مفادات کے لیے بہت اچھا ہے‘ اور اس سے خطے سمیت عالمی امن پر مثبت اثرات مرتب ہوں گے۔
جے ڈی وینس کا یہ دعویٰ ایک ایسے نازک موڑ پر سامنے آیا ہے جب چند ہی روز میں پاکستان کی میزبانی میں امریکا اور ایران سوئٹزرلینڈ کے مقام پر اس تاریخی مفاہمتی یادداشت پر باقاعدہ دستخط کرنے جا رہے ہیں۔
پاکستان اور قطر کا کلیدی کردار
سیاسی و سفارتی مبصرین کے مطابق تہران اور واشنگٹن کے مابین جمی ’برف پگھلانے‘ میں پاکستان اور قطر نے انتہائی اہم اور خفیہ سفارتی کردار ادا کیا ہے، جسے عالمی سطح پر ‘بڑی سفارتی کامیابی’ قرار دیا جا رہا ہے۔
سوئٹزرلینڈ میں ہونے والی اس دستخطی تقریب کی میزبانی بھی پاکستان کے سپرد ہونا اس بات کا ثبوت ہے کہ اسلام آباد نے اس پورے عمل میں ایک اہم پل کا کردار ادا کیا ہے۔
مزید پڑھیں:ایران امریکا معاہدہ: ایلومینیم کی قیمتیں 2 ماہ کی کم ترین سطح پر پہنچ گئیں
دوسری جانب امریکی نائب صدر جے ڈی وینس کی طرف سے کیے گئے اس دعوے اور انکشافات پر ابھی تک حکومتِ پاکستان یا دفترِ خارجہ کی طرف سے کوئی باضابطہ مؤقف یا ردعمل سامنے نہیں آیا ہے۔
