مشیر وزیراعلیٰ پنجاب برائے اے آئی و خصوصی اقدامات علی ڈار نے پنجاب صاف پانی اتھارٹی کے ہیڈکوارٹرز کا دورہ کیا، جہاں انہیں صوبے بھر میں صاف پانی کی فراہمی کے جاری منصوبوں اور اقدامات پر تفصیلی بریفنگ دی گئی۔
دورے کے موقع پر چیئرمین چوہدری زاہد اکرم اور سی ای او کیپٹن (ر) سید علی اصغر نے ان کا استقبال کیا۔ مشیر وزیراعلیٰ کو پانی کی فراہمی، معیار کی نگرانی اور جاری ترقیاتی منصوبوں سے متعلق تفصیلی آگاہ کیا گیا۔
یہ بھی پڑھیں:پاکستان اور اٹلی کے تعلقات مزید مضبوط ہوں گے، پنجاب سرمایہ کاری اور جدید ٹیکنالوجی کا مرکز بن رہا ہے، علی ڈار
علی ڈار نے کہا کہ وزیراعلیٰ پنجاب مریم نواز شریف کے ویژن کے تحت ای گورننس کے نظام کو مزید بہتر بنایا جا رہا ہے تاکہ عوامی خدمات کی فراہمی میں شفافیت اور رفتار کو یقینی بنایا جا سکے۔
انہوں نے کہا کہ پانی کے معیار کی نگرانی اور مینجمنٹ سسٹمز کو مصنوعی ذہانت کی مدد سے مزید مؤثر بنایا جائے گا، جس سے نہ صرف معیار بہتر ہوگا بلکہ بروقت مسائل کی نشاندہی بھی ممکن ہو سکے گی۔
مشیر وزیراعلیٰ کے مطابق اے آئی ٹیکنالوجی کے ذریعے عوام کو صاف اور محفوظ پانی کی فراہمی حکومت پنجاب کی اولین ترجیحات میں شامل ہے۔ انہوں نے کہا کہ جدید ٹیکنالوجی کے استعمال سے عوامی خدمات کے معیار میں نمایاں بہتری لائی جا رہی ہے۔
یہ بھی پڑھیں:پنجاب کو اے آئی پر مبنی جدید گورننس ماڈل میں ڈھالنے کے لیے اقدامات جاری، علی ڈار
علی ڈار نے مزید کہا کہ پنجاب میں اے آئی کے استعمال کا دائرہ کار مسلسل بڑھایا جا رہا ہے تاکہ گورننس کے نظام اور عوامی سہولیات میں دیرپا اور نمایاں بہتری لائی جا سکے۔
