وفاقی حکومت نے ایندھن کے تحفظ اور اضافی کفایت شعاری کے تحت نافذ کیے گئے اقدامات فوری طور پر ختم کرنے کا اعلان کردیا ہے۔
کابینہ ڈویژن کی جانب سے جاری نوٹیفکیشن کے مطابق وزیراعظم نے 9 مارچ 2026 کے بعد نافذ تمام ایندھن بچت اور اضافی کفایت شعاری اقدامات کے خاتمے کی منظوری دے دی ہے۔
یہ بھی پڑھیں: کفایت شعاری مہم کے تحت نئی پابندیاں، وفاقی وزرا کا پیٹرول کوٹہ نصف کردیا گیا، اعظم نذیرتارڑ
نوٹیفکیشن کے مطابق مارکیٹوں کے اوقاتِ کار سے متعلق 3 اور 10 جون 2026 کو جاری کردہ احکامات بدستور نافذ العمل رہیں گے، جن کے تحت دکانیں، بازار، شاپنگ مالز، ڈپارٹمنٹل اور جنرل اسٹورز رات 9 بجے بند ہوں گے۔
شادی ہال، مارکیز اور تقریبات کے لیے استعمال ہونے والی دیگر تجارتی جگہیں رات 10 بجے تک بند کی جائیں گی، جبکہ ریسٹورنٹس، کیفے، کھانے پینے کے مراکز، پھل و سبزی فروش اور کریانہ اسٹورز رات 11 بجے تک کاروبار کرسکیں گے۔ تاہم ٹیک اوے اور ہوم ڈیلیوری کی سہولت اس پابندی سے مستثنیٰ ہوگی۔
یہ بھی پڑھیں: ٹیکس دہندگان کی سہولت کے لیے بینکوں کے اوقات کار میں اضافہ
نوٹیفکیشن کے مطابق فارمیسیاں، میڈیکل اسٹورز، لیبارٹریاں، کلینکس، اسپتال، بیکریاں، تنور، دودھ اور ڈیری کی دکانیں، پٹرول و سی این جی پمپس، الیکٹرک گاڑیوں کے چارجنگ اسٹیشن، جم، کھیلوں کی سہولیات، پیڈل کورٹس، آئی ٹی کمپنیاں اور کال سینٹرز بندش کے اوقات سے مستثنیٰ رہیں گے۔
حکومت نے واضح کیا ہے کہ مشرق وسطیٰ میں حالیہ تنازع سے قبل نافذ کفایت شعاری اقدامات اور دیگر پالیسی ہدایات بدستور برقرار رہیں گی۔
