کوئٹہ میں تیزاب گردی کا نشانہ بننے والی لیڈی ڈاکٹر ماہ نور ناصر کو بہتر طبی سہولتوں کی فراہمی کے لیے بیرونِ ملک بھیجنے کا فیصلہ کرلیا گیا ہے۔ حکومت بلوچستان نے اس حوالے سے عملی اقدامات کا آغاز بھی کر دیا ہے۔
مزید پڑھیں: کیا تیزاب گردی کا شکار ڈاکٹر ماہ نور ناصر کے لیے ملزم نے رشتہ بھیجا تھا؟ والد نے حقیقت بتادی
وزیراعلیٰ بلوچستان کے معاونِ خصوصی شاہد رند نے بتایا کہ ڈاکٹر ماہ نور ناصر کو مزید علاج کے لیے امریکا منتقل کیا جائے گا۔ ان کے مطابق حکومت نے اس مقصد کے لیے ضروری انتظامات اور سرکاری کارروائی کا آغاز کر دیا ہے۔
انہوں نے مزید بتایا کہ ڈاکٹر ماہ نور اس وقت کراچی کے ایک نجی اسپتال میں زیر علاج ہیں، جہاں ان کا علاج مزید ایک ہفتے تک جاری رہے گا، جس کے بعد انہیں امریکا روانہ کرنے کی منصوبہ بندی کی جا رہی ہے۔
واضح رہے کہ چند روز قبل کوئٹہ کے سنڈیمن اسپتال میں ایک شخص نے لیڈی ڈاکٹر ماہ نور ناصر پر تیزاب پھینک دیا تھا۔ بعد ازاں ملزم مبینہ پولیس مقابلے میں ہلاک ہو گیا۔
پولیس کے مطابق یہ افسوسناک واقعہ اسپتال کے جنرل سرجری یونٹ میں پیش آیا تھا۔
حملے کے دوران ڈاکٹر ماہ نور کو بچانے کی کوشش میں اسپتال کا وارڈ بوائے عبدالرزاق ترکئی بھی شدید زخمی ہو گیا تھا۔
مزید پڑھیں: ڈاکٹر ماہ نور پر تیزاب حملہ: بلوچستان میں خواتین کے خلاف تشدد کی صورتحال سنگین، اعدادوشمار کیا بتاتے ہیں؟
عبدالرزاق ترکئی کا علاج کوئٹہ میں جاری رہا، جبکہ ڈاکٹر ماہ نور ناصر کو مزید علاج کے لیے کراچی منتقل کردیا گیا تھا۔
