ایران کے صدر ڈاکٹر مسعود پزیشکیان کل پاکستان کے ایک روزہ سرکاری دورے پر اسلام آباد پہنچیں گے۔
سفارتی ذرائع کے مطابق دورے کے دوران وہ پاکستان کی اعلیٰ سیاسی قیادت سے اہم ملاقاتیں کریں گے۔
یہ بھی پڑھیں: امریکا ایران ڈیل: ’تاریخ رقم ہوگئی، پاکستان کی شاندار سفارتکاری نے دنیا کو حیران کردیا‘
ذرائع کا کہنا ہے کہ ایرانی صدر کی صدرِ مملکت آصف زرداری اور وزیرِ اعظم شہباز شریف سے الگ الگ ملاقاتیں متوقع ہیں۔
ان ملاقاتوں میں دوطرفہ تعلقات، علاقائی صورتحال اور باہمی دلچسپی کے مختلف امور پر تبادلہ خیال کیا جائے گا۔
ایران کے صدر مسعود پزشکیان کا پاکستان کے مختص دورے کا امکان ہے وہ کل پاکستان کا دورہ کر سکتے ہیں اور وہ اپنے دورے میں پاکستان کی سول اور ملٹری قیادت سے اہم ملاقاتیں بھی کریں گے اور ایران امریکہ امن معاہدے اور ثالثی کردار ادا کرنے پر پاکستان کا خصوصی طور پر شکر ادا کریں گے۔ pic.twitter.com/cdzwq1bmjk
— Sabir Mehmood Hashmi (@SabirMehmood26) June 22, 2026
سفارتی ذرائع کے مطابق ملاقاتوں میں حالیہ ایران امریکا مفاہمت اور مذاکراتی عمل بھی زیرِ بحث آئے گا، جبکہ پاک ایران تعلقات کو مزید مستحکم بنانے، تجارت، سرحدی تعاون اور علاقائی امن و استحکام سے متعلق معاملات پر بھی گفتگو کی جائے گی۔
ذرائع کے مطابق دونوں ممالک کی قیادت علاقائی اور بین الاقوامی سطح پر پیش آنے والی تازہ پیش رفت سمیت کثیرالجہتی امور پر مشاورت کرے گی۔
مزید پڑھیں: امریکا ایران مذاکرات میں اہم پیشرفت، 60 روز میں حتمی امن معاہدے پر اتفاق
ایرانی صدر کا یہ دورہ ایسے وقت میں ہو رہا ہے جب خطے میں سفارتی سرگرمیوں میں تیزی دیکھی جا رہی ہے اور ایران و امریکا کے درمیان مذاکراتی عمل عالمی توجہ کا مرکز بنا ہوا ہے۔
مبصرین کے مطابق ڈاکٹر مسعود پزیشکیان کا دورۂ پاکستان دونوں ہمسایہ ممالک کے تعلقات کو مزید فروغ دینے اور اہم علاقائی معاملات پر ہم آہنگی بڑھانے میں اہم کردار ادا کر سکتا ہے۔
