وفاقی حکومت نے ریڈ زون اسلام آباد میں واقع وزارتوں، ڈویژنز اور دیگر سرکاری اداروں کے ملازمین کو 23 جون 2026 کو گھر سے کام (ورک فرام ہوم) کرنے کی ہدایت جاری کر دی ہے۔ کابینہ ڈویژن کی جانب سے جاری نوٹیفکیشن کے مطابق یہ فیصلہ منگل کے روز نافذ العمل رہے گا۔
مزید پڑھیں:اسلام آباد مذاکرات: ریڈ زون سیل اور ٹریفک کا جامع پلان نافذ، ایڈوائزری جاری
نوٹیفکیشن کے مطابق کابینہ ڈویژن، فیڈرل بورڈ آف ریونیو (ایف بی آر)، وزارت خزانہ، وزارت تجارت، وزارت خارجہ، وزارت صنعت و پیداوار، وزارت داخلہ، وزارت قانون و انصاف، وزارت پارلیمانی امور، وزارت منصوبہ بندی، قومی اسمبلی و سینیٹ سیکریٹریٹ، وزیراعظم آفس اور ریونیو ڈویژن معمول کے مطابق دفاتر سے کام کرتے رہیں گے۔
کابینہ ڈویژن نے ہدایت کی کہ ریڈ زون میں واقع خودمختار ادارے اور منسلک محکمے بند رہیں گے، جبکہ گھر سے کام کرنے والی وزارتوں اور اداروں کے افسران اور سیکریٹریل عملہ اپنے متعلقہ اسٹیشنز پر موجود رہے گا اور ضرورت پڑنے پر مختصر نوٹس پر دفتر آنے کے لیے تیار ہوگا۔
نوٹیفکیشن میں واضح کیا گیا ہے کہ یہ ہدایات بینکوں پر لاگو نہیں ہوں گی اور تمام بینک معمول کے مطابق کھلے رہیں گے۔ کابینہ سیکریٹری کامران علی افضل کے دستخطوں سے جاری اعلامیے میں اس فیصلے کی وسیع پیمانے پر تشہیر کے لیے پرنٹ اور الیکٹرانک میڈیا کو بھی آگاہ کیا گیا۔
