صدر مملکت آصف علی زرداری سے ایران کے صدر ڈاکٹر مسعود پزشکیان نے ایوانِ صدر میں ملاقات کی، جس میں پاک ایران دوطرفہ تعلقات، علاقائی امن و سلامتی، اقتصادی تعاون اور باہمی دلچسپی کے مختلف امور پر تفصیلی تبادلہ خیال کیا گیا۔
ملاقات کے دوران دونوں رہنماؤں نے پاکستان اور ایران کے درمیان برادرانہ تعلقات کو مزید مستحکم بنانے، اقتصادی تعاون کو فروغ دینے اور مختلف شعبوں میں دوطرفہ روابط کو وسعت دینے کے عزم کا اعادہ کیا۔
صدر آصف علی زرداری نے حالیہ تنازع کے بعد ایران کے صدر ڈاکٹر مسعود پزشکیان کے دورہ پاکستان کو دونوں برادر ممالک کے مضبوط تعلقات کا مظہر قرار دیا۔
صدر مملکت نے ایرانی ہم منصب کو اسلام آباد مفاہمت کی یادداشت پر دستخط ہونے پر مبارکباد پیش کرتے ہوئے اس امید کا اظہار کیا کہ تکنیکی سطح پر ہونے والے مذاکرات خطے میں مستقل امن اور استحکام کا باعث بنیں گے۔
انہوں نے کہاکہ پاکستان ایران کے امن، استحکام، خودمختاری اور علاقائی سالمیت کی اصولی حمایت کرتا ہے۔
ان کا کہنا تھا کہ پاکستان نے ہمیشہ یکطرفہ اقدامات کی مخالفت کی ہے اور تمام تنازعات کے حل کے لیے سفارت کاری اور مذاکرات کی حمایت کی ہے۔
صدر آصف علی زرداری نے امتِ مسلمہ کے اتحاد کو ناگزیر قرار دیتے ہوئے خلیجی ممالک کے ساتھ مضبوط تعلقات برقرار رکھنے کے عزم کا اظہار کیا۔
انہوں نے ایران کے سپریم لیڈر آیت اللہ سید مجتبیٰ حسینی خامنہ ای کے لیے ایرانی صدر کے ذریعے اپنی نیک خواہشات کا پیغام بھی بھجوایا۔
صدر مملکت نے علی حسینی خامنہ ای کی شہادت پر ایک بار پھر تعزیت کا اظہار کرتے ہوئے اعلان کیاکہ پاکستان ان کے جنازے میں شرکت کرے گا۔
ایران کے صدر ڈاکٹر مسعود پزشکیان نے اس موقع پر خطے میں امن اور مذاکرات کے فروغ کے لیے پاکستان کی تعمیری کوششوں اور مسلسل حمایت کو قابلِ ستائش قرار دیا۔
مزید پڑھیں: ایران نے اعلیٰ سطح کے جوہری معائنے پر اتفاق کرلیا، مذاکرات مثبت انداز میں آگے بڑھ رہے ہیں، ڈونلڈ ٹرمپ
انہوں نے کہاکہ ایران پاکستان کے ساتھ اپنے تعلقات کو انتہائی اہمیت دیتا ہے اور دونوں ممالک کے درمیان مختلف شعبوں میں تعاون کو مزید فروغ دیا جائےگا۔
