کوئٹہ کے شہری نے اپنے منفرد شوق کے ذریعے گھر کی چھت کو خوبصورت اور سرسبز باغ میں تبدیل کردیا، جہاں ہزاروں اقسام کے مقامی اور درآمد شدہ پودے موجود ہیں۔
چھت کے مالک محمد آصف نے وی نیوز سے گفتگو کرتے ہوئے بتایا کہ انہیں گزشتہ 7 برس سے پودے لگانے کا شوق ہے۔ اس دوران انہوں نے اپنی چھت پر بڑے پیمانے پر مختلف اقسام کے پودے لگائے، جن میں کئی نایاب اور بیرونِ ملک سے درآمد کیے گئے پودے بھی شامل ہیں۔
مزید پڑھیں: پودے بھی جانداروں سے اپنے دل کا حال بیان کرتے ہیں، حیرت انگیز تحقیق
محمد آصف کا کہنا تھا کہ شوق کی کوئی قیمت نہیں ہوتی۔ لوگ اکثر ان سے اس باغ پر آنے والی لاگت کے بارے میں پوچھتے ہیں، لیکن ان کے مطابق جب انسان کسی چیز کا حقیقی شوق رکھتا ہو تو وہ اخراجات کو نہیں دیکھتا۔
انہوں نے کہاکہ ہر شخص کو اپنے گھر میں کم از کم چند گملے ضرور رکھنے چاہییں، کیونکہ پودے نہ صرف ماحول کو خوشگوار بناتے ہیں بلکہ آکسیجن فراہم کرنے کے ساتھ ذہنی سکون کا بھی باعث بنتے ہیں۔
محمد آصف کے مطابق ان کے باغ میں ایسے پودے بھی موجود ہیں جو کوئٹہ کے موسم میں بخوبی نشوونما پاتے ہیں، جبکہ سندھ اور پنجاب کے انڈور پلانٹس بھی انہوں نے خصوصی دیکھ بھال، درجہ حرارت، نمی، سایہ اور مناسب ماحول فراہم کرکے کامیابی سے محفوظ رکھے ہوئے ہیں۔
انہوں نے بتایا کہ ان کے کلیکشن میں آؤٹ ڈور اور انڈور پلانٹس، کیکٹس، سیکولنٹس، ہینگنگ پلانٹس، واٹر پلانٹس، بونسائی اور ایئر پلانٹس سمیت بے شمار اقسام شامل ہیں۔ ’ایئر پلانٹس کی خاص بات یہ ہے کہ وہ مٹی کے بغیر ہوا میں زندہ رہتے ہیں اور انہیں صرف وقتاً فوقتاً اسپرے کی ضرورت ہوتی ہے۔‘
مزید پڑھیں: سوات یونیورسٹی کے طالبعلم کا مٹی، ہوا کے بنا پودے اگانے کا کامیاب تجربہ
محمد آصف نے مزید بتایا کہ انہوں نے مختلف اقسام کے پودوں کو یکجا کرکے منفرد تھیمز تخلیق کیے ہیں، جن میں عربین تھیم، جنگل تھیم اور دیگر دلکش ڈیزائن شامل ہیں، اور ان تھیمز نے ان کی چھت کو ایک خوبصورت، سرسبز اور قدرتی منظر میں تبدیل کردیا ہے۔
