پاکستان پیپلز پارٹی اور جمعیت علمائے اسلام نے آزاد جموں و کشمیر قانون ساز اسمبلی کے انتخابات کے لیے سیاسی اتحاد کا اعلان کردیا۔
اسلام آباد میں پیپلز پارٹی اور جے یو آئی آزاد جموں و کشمیر کے رہنماؤں نے مشترکہ پریس کانفرنس کی، جس میں دونوں جماعتوں کے درمیان انتخابی تعاون کا باقاعدہ اعلان کیا گیا۔
پریس کانفرنس سے خطاب کرتے ہوئے پیپلز پارٹی آزاد کشمیر کے صدر چوہدری یاسین نے کہاکہ آزاد کشمیر میں جے یو آئی کے ساتھ باضابطہ سیاسی اتحاد کیا جا رہا ہے، جس سے ریاست میں دونوں جماعتوں کو سیاسی فائدہ حاصل ہوگا۔
انہوں نے کہاکہ پیپلز پارٹی کی قیادت نے ہمیشہ مسئلہ کشمیر کو ہر فورم پر بھرپور انداز میں اجاگر کیا ہے۔
چوہدری یاسین نے اعلان کیاکہ ایل اے 14 اور ایل اے 23 پر جے یو آئی کے امیدوار دونوں جماعتوں کے مشترکہ امیدوار ہوں گے۔
اس موقع پر جے یو آئی آزاد کشمیر کے امیر مولانا سعید یوسف نے کہاکہ آزاد جموں و کشمیر کی تاریخ میں پہلی مرتبہ جے یو آئی کا پیپلز پارٹی کے ساتھ اتحاد ہوا ہے۔
انہوں نے بتایا کہ پیپلز پارٹی دو حلقوں میں جے یو آئی کے امیدواروں کی حمایت کرے گی، جبکہ باقی تمام حلقوں میں جے یو آئی پیپلز پارٹی کے امیدواروں کو سپورٹ کرے گی۔
واضح رہے کہ آزاد کشمیر قانون ساز اسمبلی کے انتخابات 27 جولائی کو ہوں گے۔
