سندھ کے شہر حیدرآباد میں واقع ایک سرکاری اسکول نے عالمی سطح پر پاکستان کا نام روشن کرتے ہوئے ’ورلڈز بیسٹ اسکول پرائزز 2026‘ کی ’کمیونٹی کولیبریشن‘ کیٹیگری میں دنیا کے بہترین 10 فائنلسٹ اسکولوں میں جگہ بنا لی ہے۔
مزید پڑھیں: پاک فوج کی کاوشوں سے شمالی وزیرستان کے طلباء و طالبات ملک کے بہترین اسکولوں میں زیر تعلیم
یہ اعزاز گورنمنٹ گرلز لوئر سیکنڈری اسکول، ٹنڈو میر غلام حسین کو حاصل ہوا، جو اس سال پاکستان کے ان دو تعلیمی اداروں میں شامل ہے جنہیں اس باوقار عالمی مقابلے کے لیے شارٹ لسٹ کیا گیا۔ ان میں ایک پنجاب کا نجی اسکول جبکہ دوسرا سندھ کا یہ سرکاری اسکول ہے۔
ورلڈز بیسٹ اسکول پرائزز کا انعقاد عالمی تعلیمی ادارے T4 Education کی جانب سے کیا جاتا ہے۔ ان ایوارڈز کا مقصد دنیا بھر کے ایسے تعلیمی اداروں کی حوصلہ افزائی کرنا ہے جو تعلیم کے فروغ، طلبہ کی فلاح و بہبود اور معاشرتی ترقی میں نمایاں کردار ادا کررہے ہوں۔
تعلیمی شعبے کے معتبر ترین بین الاقوامی اعزازات میں شمار کیے جانے والے اس مقابلے میں دنیا بھر سے ہزاروں اسکول درخواستیں جمع کراتے ہیں، تاہم سخت جانچ پڑتال کے بعد صرف چند منتخب ادارے ہی فائنل مرحلے تک رسائی حاصل کرتے ہیں۔
مزید پڑھیں: ننھے ولاگر شیراز کا شاندار اقدام، سوشل میڈیا کی کمائی سے اسکول اپ گریڈ کروا دیا
اس کامیابی پر سندھ کے وزیر تعلیم سید سردار علی شاہ نے اسکول کی انتظامیہ، پرنسپل، اساتذہ، طلبہ، والدین اور مقامی برادری کو مبارکباد پیش کرتے ہوئے کہاکہ یہ اعزاز صرف ایک تعلیمی ادارے کی کامیابی نہیں بلکہ سندھ کے سرکاری تعلیمی نظام اور پورے پاکستان کے لیے باعثِ فخر ہے۔
