اداکارہ اور ٹی وی میزبان جگن کاظم نے مری سے نتھیا گلی جانے والے ہائیکنگ ٹریلز پر سیاحوں کی جانب سے کچرا پھیلانے پر شدید افسوس کا اظہار کرتے ہوئے عوام سے ماحول کو صاف رکھنے کی اپیل کی ہے۔
جگن کاظم نے سوشل میڈیا پر شیئر کی گئی ایک ویڈیو میں ٹریلز پر بکھری پلاسٹک کی بوتلیں، ریپرز اور دیگر کچرے کی نشاندہی کرتے ہوئے کہا کہ لوگ ایک طرف ملک کی حالت پر شکایت کرتے ہیں، لیکن دوسری جانب خود صفائی کا خیال نہیں رکھتے۔
یہ بھی پڑھیں: ’تضحیک بند کریں، انسانیت دکھائیں‘ جگن کاظم اپنے ہی مداحوں پر کیوں برس پڑیں؟
انہوں نے کہا کہ ہم ہمیشہ یہ کہتے ہیں کہ ملک کا کیا بنے گا، حالات کیسے بہتر ہوں گے، لیکن جب تک ہم اپنی صفائی اور اپنے کچرے کی ذمہ داری خود نہیں لیں گے، اس وقت تک کوئی مثبت تبدیلی نہیں آسکتی۔
اداکارہ نے کہا کہ وہ عام طور پر سوشل میڈیا پر سخت الفاظ استعمال نہیں کرتیں، مگر اس صورتحال پر خاموش رہنا ممکن نہیں تھا۔
جگن کاظم نے موسمیاتی تبدیلی کا حوالہ دیتے ہوئے کہا کہ آلودگی کے باعث موسم غیر معمولی ہوتا جا رہا ہے۔ کبھی گرمیوں میں ژالہ باری ہو رہی ہے تو کبھی سردیوں میں گرمی محسوس ہوتی ہے۔ ان کے مطابق یہ سب ماحولیاتی آلودگی اور صفائی کے ناقص رویوں کا نتیجہ ہے۔
انہوں نے کہا کہ اللہ تعالیٰ نے انسان کو ایک خوبصورت دنیا عطا کی ہے، لیکن اگر ہم اس کا خیال نہیں رکھیں گے تو ماحول کی خرابی کا ذمہ دار بھی ہمیں خود کو ہی ٹھہرانا ہوگا۔
یہ بھی پڑھیں: جگن کاظم کو خوبصورت مرد سے شادی کرکے بھی پچھتاوا کیوں؟
اپنی پوسٹ کے ساتھ انہوں نے سیاحوں کے نام پیغام میں لکھا کہ ہم خوبصورت مقامات پر سکون حاصل کرنے جاتے ہیں، اس لیے وہاں اپنا کچرا دوسروں کے لیے نہ چھوڑیں۔ اپنی یادیں ساتھ لے جائیں، تصاویر ساتھ لے جائیں اور اپنا کچرا بھی اپنے ساتھ واپس لے جائیں۔
جگن کاظم کی اس اپیل کو سوشل میڈیا صارفین نے بھرپور سراہا۔ متعدد افراد نے کہا کہ جدید دور کے بہت سے سیاح شہری ذمہ داری اور سماجی شعور کو پس پشت چھوڑ چکے ہیں، جبکہ کئی صارفین نے قدرتی مقامات پر کچرا پھینکنے والوں کے خلاف جرمانے عائد کرنے کا مطالبہ بھی کیا۔
