نام نہاد بلوچ یکجہتی کمیٹی کی سربراہ ماہرنگ لانگو کے والد کی قبر پر کالعدم بلوچ لبریشن آرمی کا پرچم لہرا دیا گیا۔
منظرعام پر آنے والی ایک نئی ویڈیو میں کالعدم بلوچ لبریشن آرمی (بی ایل اے) کا پرچم عبدالغفار لانگو کی قبر پر لہراتے ہوئے دکھایا گیا ہے۔
عبدالغفار لانگو ایک عسکریت پسند رہنما اور بلوچ یکجہتی کمیٹی (بی وائی سی) کی چیف آرگنائزر ماہرنگ لانگو کے والد تھے۔
عبدالغفار لانگو کو دہشتگردی کے مقدمے میں انسداد دہشتگردی عدالت (اے ٹی سی) نے عمر قید کی سزا سنائی تھی، تاہم بلوچستان میں کمزور استغاثہ کے باعث عدالت نے بعد ازاں انہیں بری کردیا تھا۔
رپورٹس کے مطابق عبدالغفار لانگو اندرونی اختلافات کے باعث کالعدم بلوچ لبریشن آرمی کے عسکریت پسندوں کے ہاتھوں مارے گئے، تاہم بلوچ یکجہتی کمیٹی نے دعویٰ کیا تھا کہ انہیں ریاستی اداروں نے قتل کیا۔
رپورٹ میں کہا گیا ہے کہ چونکہ بلوچ لبریشن آرمی ایک کالعدم دہشتگرد تنظیم ہے جس پر بڑی تعداد میں شہریوں کی ہلاکتوں کی ذمہ داری عائد کی جاتی ہے، اس لیے عبدالغفار لانگو کی قبر پر اس تنظیم کا پرچم لہرانا بلوچ یکجہتی کمیٹی کے اس دعوے کو شدید متاثر کرتا ہے کہ وہ ایک پرامن انسانی حقوق کی تنظیم کے طور پر کام کررہی ہے۔
انتہا پسند عناصر بلوچ یکجہتی کمیٹی کو ایک نرم محاذ کے طور پر استعمال کرتے ہوئے قومی اور بین الاقوامی سطح پر رائے عامہ کو گمراہ کرنے کی کوشش کررہے ہیں، تاکہ اپنی دہشتگردانہ سرگرمیوں کے لیے جگہ اور گنجائش پیدا کی جا سکے۔
