تھائی لینڈ کے شمال مشرقی صوبے مکداہان میں 11 سالہ بچے نے اپنے والدین کا پک اپ ٹرک چلاتے ہوئے بدھ راہبوں کے ایک مذہبی جلوس کو کچل دیا، جس کے نتیجے میں 9 راہب ہلاک جبکہ متعدد دیگر زخمی ہوگئے۔
غیر ملکی میڈیا کے مطابق واقعہ اس وقت پیش آیا جب 35 بدھ راہب اور 5 عام شہری مذہبی یاترا کے دوران سڑک کے کنارے پیدل جارہے تھے، 5 راہب موقع پر ہی دم توڑ گئے، جبکہ 3 نے اسپتال میں زخموں کی تاب نہ لاتے ہوئے جان سے گئے۔ بعد ازاں صوبائی انتظامیہ نے ایک اور راہب کی ہلاکت کی تصدیق کی، جس کے بعد مجموعی تعداد 9 ہوگئی۔
یہ بھی پڑھیں: کم عمر بچے کی گاڑی چلاتے پرانی ویڈیو وائرل، ’کیا یہ وہی ابوذر ہے جس کی گاڑی سے 2 لڑکیاں جاں بحق ہوئیں؟‘
واقعے میں تقریباً 10 راہب شدید زخمی ہوئے، جبکہ دیگر کو معمولی چوٹیں آئیں اور انہیں طبی امداد کی فراہمی کے بعد اسپتال سے ڈسچارج کردیا گیا ہے۔
حادثے میں محفوظ رہنے والے راہب فرا سومپونگ نے بتایا کہ وہ دعا پڑھ رہے تھے کہ اچانک ایک تیز رفتار پک اپ ٹرک جلوس پر چڑھ دوڑا۔ انہوں نے کہا کہ وہ اور ایک اور راہب بروقت چھلانگ لگا کر بچ گئے، تاہم پیچھے موجود کئی راہب شدید متاثر ہوئے اور بعض ہوا میں اچھل گئے۔
قریبی مقام پر نصب نگرانی کیمرے کی ویڈیو میں راہبوں کو سڑک پر چلتے ہوئے دیکھا جا سکتا ہے، جس کے چند لمحوں بعد زور دار تصادم کی آواز سنائی دیتی ہے۔
پولیس کا کہنا ہے کہ 11 سالہ بچے نے والدین کی اجازت کے بغیر پک اپ ٹرک نکالا تھا، تاہم گاڑی پر قابو نہ رکھ سکا اور جلوس سے جا ٹکرایا۔ گاڑی کو تکنیکی معائنے کے لیے تحویل میں لے لیا گیا ہے تاکہ حادثے کی وجوہات معلوم کی جاسکیں۔
یہ بھی پڑھیں: مریم نواز نے ٹریفک قوانین خلاف ورزی پر کم عمر بچوں کو گرفتار کرنے سے روک دیا
پولیس حکام کے مطابق بچے کے والدین کو بھی طلب کرلیا گیا ہے تاکہ یہ تعین کیا جاسکے کہ بچے کی نگرانی اور ذمہ داری کس پرعائد ہوتی ہے اور آئندہ قانونی کارروائی کس نوعیت کی ہوگی۔
تھائی قانون کے مطابق 12 سال سے کم عمر بچوں پر فوجداری ذمہ داری عائد نہیں ہوتی، اس لیے 11 سالہ بچے کے خلاف براہ راست فوجداری مقدمہ نہیں چلایا جاسکتا۔
صوبائی گورنر نے واقعے کو سڑکوں پر حفاظتی اقدامات کی اہمیت کی یاد دہانی قرار دیتے ہوئے کہا کہ والدین کو بھی اس بات کو یقینی بنانا چاہیے کہ کم عمر بچے گاڑیاں نہ چلائیں۔
واضح رہے کہ تھائی لینڈ میں ٹریفک حادثات کی شرح دنیا میں بلند ترین ممالک میں شمار ہوتی ہے، جہاں تیز رفتاری، نشے کی حالت میں ڈرائیونگ اور ٹریفک قوانین پر کمزور عمل درآمد کو اہم وجوہات قرار دیا جاتا ہے۔
