اسلام آباد پولیس نے بروقت اور مؤثر کارروائی کرتے ہوئے پنجاب کے ضلع سرگودھا کے علاقے بھاگٹا نوالا سے اغوا ہونے والے ایک سالہ بچے کو وفاقی دارالحکومت سے بحفاظت بازیاب کروا لیا۔
یہ بھی پڑھیں: اسلام آباد پولیس کے سابق ایس پی کو سزائے موت سنا دی گئی
ترجمان اسلام آباد پولیس کے مطابق ایس پی ہیڈکوارٹرز و انڈسٹریل ایریا زون پری گل ترین کی ہدایت پر ایس ایچ او تھانہ انڈسٹریل ایریا کی نگرانی میں خصوصی پولیس ٹیمیں تشکیل دی گئیں جنہوں نے جدید ٹیکنالوجی، سیف سٹی کیمروں اور انسانی ذرائع کی مدد سے کارروائی کرتے ہوئے بچے کو فیض آباد کے علاقے سے بحفاظت بازیاب کر لیا۔
پری گل ترین کے مطابق پولیس ٹیموں نے کامیاب آپریشن کے دوران کمسن بچے کو بحفاظت بازیاب کرنے کے بعد پنجاب پولیس کے حوالے کر دیا۔
بچے کی بازیابی پر والدین نے اسلام آباد پولیس کی فوری اور مؤثر کارروائی کو سراہتے ہوئے شکریہ ادا کیا۔
مزید پڑھیے: گھریلو ناچاقی پر 2خواتین کا قتل، اسلام آباد پولیس نے 48 گھنٹوں میں ملزمان گرفتار کرلیے
ایس پی ہیڈکوارٹرز و انڈسٹریل ایریا زون پری گل ترین نے کہا کہ شہریوں کے جان و مال کا تحفظ اسلام آباد پولیس کی اولین ترجیح ہے اور عوام کے تحفظ کو یقینی بنانے کے لیے تمام دستیاب وسائل بروئے کار لائے جا رہے ہیں۔
