متحدہ عرب امارات میں اس موسمِ گرما پاکستانی آم گزشتہ برس کے مقابلے میں تقریباً 20 فیصد مہنگے فروخت ہو رہے ہیں تاہم قیمتوں میں اضافے کے باوجود ان کی مانگ میں کوئی کمی نہیں آئی۔
تاجروں کے مطابق پاکستان میں آم کی پیداوار میں 20 سے 30 فیصد کمی سیزن کے تاخیر سے آغاز اور بڑھتے ہوئے فضائی و بحری مال برداری کے اخراجات نے قیمتوں میں اضافے کی بڑی وجہ بنے ہیں۔ اس کے باوجود پاکستانی آم اپنی منفرد مٹھاس، خوشبو اور ذائقے کے باعث مقامی اور غیرملکی صارفین میں بدستور مقبول ہیں۔
یہ بھی پڑھیں: ایرانی سڑکوں پر پاکستانی آم دیکھ کر پاکستانی سفیر خوشی سے سرشار
پاکستان سپر مارکیٹ ایل ایل سی کے ڈائریکٹر گل رئیس یاسین کے مطابق پاکستانی آموں کی طلب ہر سال بڑھ رہی ہے اور اب صرف پاکستانی ہی نہیں بلکہ مختلف قومیتوں کے خریدار بھی خاص طور پر سندھڑی، چونسہ اور انور رٹول جیسی اقسام خریدنے آتے ہیں۔
انہوں نے بتایا کہ 3 سے 3.5 کلوگرام کے سندھڑی آم کا ڈبہ، جو گزشتہ برس 40 سے 45 درہم میں فروخت ہوتا تھا اب تقریباً 50 درہم میں دستیاب ہے جبکہ فضائی راستے سے درآمد کیے جانے والے چونسہ اور انور رٹول آموں کی قیمت 60 سے 65 درہم سے بڑھ کر تقریباً 70 درہم فی ڈبہ ہو گئی ہے۔
یہ بھی پڑھیں: قطر کے خاص فیسٹیول میں رسیلے پاکستانی آم کی دھوم
ان کے مطابق فضائی کارگو کی لاگت تقریباً 350 پاکستانی روپے فی کلو سے بڑھ کر 500 روپے فی کلو تک پہنچ چکی ہے جبکہ سیزن کے آغاز میں کارگو کی محدود دستیابی نے بھی درآمدی لاگت میں اضافہ کیا۔
دوسری جانب Choithrams کے ہیڈ آف کمرشل برائن بالنگر نے بتایا کہ اس سال پاکستانی آموں کا سیزن معمول سے تقریباً دو ہفتے تاخیر سے شروع ہوا جبکہ مجموعی پیداوار میں 20 سے 30 فیصد کمی ریکارڈ کی گئی ہے۔ ان کے مطابق محدود سپلائی کے باوجود پاکستانی آموں کی فروخت مضبوط رہی اور صارفین کی دلچسپی میں کوئی نمایاں کمی نہیں آئی۔
یہ بھی پڑھیں: پاکستانی آموں کی چین میں دھوم، دوسری کھیپ گوانگسی پہنچ گئی
درآمد کنندگان کا کہنا ہے کہ ابتدائی دنوں میں بحری جہازوں کی تاخیر اور کارگو مسائل کے باعث انہیں زیادہ تر آم فضائی راستے سے منگوانا پڑے جس سے قیمتیں بعض اوقات گزشتہ سال کے مقابلے میں تقریباً دوگنا تک پہنچ گئیں۔ بعد ازاں بحری ترسیل بحال ہونے سے قیمتوں میں کچھ کمی ضرور آئی تاہم وہ اب بھی گزشتہ سال سے زیادہ ہیں۔
تاجروں کے مطابق پاکستانی آموں کا سیزن صرف دو سے اڑھائی ماہ پر مشتمل ہوتا ہے اسی لیے صارفین قیمتوں میں اضافے کے باوجود انہیں خریدنے کو ترجیح دیتے ہیں۔ سندھڑی، چونسہ اور انور رٹول بدستور اماراتی مارکیٹ میں سب سے زیادہ پسند کی جانے والی اقسام ہیں جبکہ گھروں، دفاتر اور تحائف کے طور پر بھی پاکستانی آموں کی مانگ برقرار ہے۔
