ایپل کے نئے فلیگ شپ فونز آئی فون 18 پرو اور آئی فون 18 پرو میکس کی بیٹری گنجائش سے متعلق تفصیلات سامنے آگئی ہیں، جن کے مطابق نئے ماڈلز میں موجودہ فونز کے مقابلے میں زیادہ بڑی بیٹریاں دی جاسکتی ہیں۔
رپورٹس کے مطابق چین میں سامنے آنے والی سرٹیفکیشن دستاویزات سے معلوم ہوتا ہے کہ آئی فون 18 پرو میں چین کے ماڈل کے لیے 4056 ایم اے ایچ جبکہ امریکا میں فروخت ہونے والے ماڈل میں 4288 ایم اے ایچ بیٹری شامل کی جاسکتی ہے۔
یہ بھی پڑھیں: بھارت میں سائبر سیکیورٹی کی بڑی ناکامی، آئی فون 18 کی لانچ سے قبل ایپل کا حساس ڈیٹا چوری
یہ اضافہ آئی فون 17 پرو کے مقابلے میں معمولی ہے، کیونکہ اس ماڈل میں چین اور امریکا کے ورژن میں بالترتیب 3988 ایم اے ایچ اور 4252 ایم اے ایچ بیٹری دی گئی تھی۔
آئی فون 18 پرو میکس میں زیادہ نمایاں تبدیلی متوقع ہے۔ لیک ہونے والی معلومات کے مطابق اس فون میں چین کے ماڈل کے لیے 5391 ایم اے ایچ جبکہ امریکا کے ماڈل میں 5567 ایم اے ایچ بیٹری دی جاسکتی ہے، جو گزشتہ ماڈل کے مقابلے میں تقریباً 500 ایم اے ایچ زیادہ ہے۔
رپورٹس کے مطابق امریکی ماڈلز میں بیٹری گنجائش زیادہ ہونے کی وجہ یہ ہے کہ امریکا میں آئی فون 14 سیریز کے بعد سے کئی ماڈلز میں صرف ای سم کی سہولت دی جا رہی ہے، جبکہ دیگر ممالک میں فزیکل سم کارڈ ٹرے موجود ہوتی ہے۔ سم کارڈ ٹرے نہ ہونے سے فون کے اندر اضافی جگہ مل جاتی ہے جسے بڑی بیٹری کے لیے استعمال کیا جاسکتا ہے۔
یہ بھی پڑھیں: آئی فون صارفین کیلئے خوشخبری، آئی او ایس 26 کے پوشیدہ فیچرز سامنے آگئے
بڑی بیٹری، خاص طور پر آئی فون 18 پرو میکس میں، صارفین کو زیادہ دیر تک فون استعمال کرنے کی سہولت فراہم کر سکتی ہے۔ اطلاعات کے مطابق نئے فونز میں ایپل کی نئی اے 20 پرو چپ شامل ہو سکتی ہے جو بجلی کے کم استعمال اور بہتر کارکردگی میں مدد دے گی۔
آئی فون 18 پرو سیریز میں کیمرے کے شعبے میں بھی بہتری کی توقع کی جا رہی ہے۔ رپورٹس کے مطابق نئے ماڈلز میں چھوٹا ڈائنامک آئی لینڈ، بہتر فوٹوگرافی کے لیے متغیر اپرچر والا مرکزی کیمرا اور امریکا کے علاوہ دیگر ممالک کے ماڈلز میں ایپل کا نیا موڈیم شامل کیا جاسکتا ہے۔
توقع ہے کہ ایپل ستمبر 2026 میں آئی فون 18 پرو اور آئی فون 18 پرو میکس متعارف کرائے گا۔ اسی تقریب میں کمپنی اپنا پہلا فولڈ ایبل آئی فون بھی پیش کر سکتی ہے، جسے ایپل کی بڑی مصنوعات میں شمار کیا جارہا ہے۔
