حیدر آباد میں بینظیر انکم سپورٹ پروگرام کی مستحق خواتین کو ملنے والی امدادی رقم میں غیر قانونی کٹوتی کرنے والے 8 ڈیوائس ہولڈرز کو گرفتار کرلیا گیا ہے، جبکہ ملزمان کے قبضے سے لاکھوں روپے اور بایومیٹرک ڈیوائسز برآمد کرلی گئیں۔
یہ بھی پڑھیں: ایف آئی اے کا بینظیر انکم سپورٹ پروگرام میں غیر قانونی کٹوتیوں کے خلاف بڑا کریک ڈاؤن، 2 ملزمان گرفتار
وفاقی تحقیقاتی ادارے کے حکام کے مطابق لطیف آباد کے بینظیر انکم سپورٹ پروگرام ٹرنچ سینٹر پر شکایات موصول ہونے کے بعد کارروائی کی گئی، جہاں ڈیوائس ہولڈرز مستحق خواتین کی فی قسط سے غیر قانونی طور پر 1500 سے 2000 روپے تک کی رقم کاٹ رہے تھے۔
حکام نے بتایا کہ کارروائی کے دوران 8 افراد کو گرفتار کرکے ان کے قبضے سے بایومیٹرک ڈیوائسز، اہم ریکارڈ اور 13 لاکھ 86 ہزار روپے سے زائد رقم برآمد کرلی گئی۔
یہ بھی پڑھیں: بینظیر انکم سپورٹ پروگرام سے جعلی ٹریفک چالان تک، اسکیمرز شہریوں کو کیسے لوٹ رہے ہیں؟
وفاقی تحقیقاتی ادارے کے مطابق گرفتار ملزمان کے خلاف مقدمہ درج کرلیا گیا ہے، جبکہ ان کی نشاندہی پر مزید افراد کے خلاف کارروائی جاری ہے۔
