وزیراعظم محمد شہباز شریف سے اقوام متحدہ کے سیکریٹری جنرل کے عہدے کے امیدوار میکی سال نے اسلام آباد میں ملاقات کی، جس میں وزیراعظم نے عالمی امور میں اقوام متحدہ کے مرکزی کردار کے لیے پاکستان کی غیر متزلزل حمایت کا اعادہ کرتے ہوئے امید ظاہر کی کہ نئی قیادت امن و سلامتی، ترقی اور انسانی حقوق کے فروغ کے لیے مؤثر اور متوازن انداز میں کام جاری رکھے گی۔
اسلام آباد میں وزیراعظم ہاؤس میں ہونے والی ملاقات میں وزیراعظم محمد شہباز شریف نے اقوام متحدہ کے سیکریٹری جنرل کے عہدے کے امیدوار میکی سال کا خیر مقدم کیا اور کہا کہ پاکستان کثیرالجہتی سفارت کاری (ملٹی لیٹرلزم) پر پختہ یقین رکھتا ہے اور عالمی معاملات میں اقوام متحدہ کے مرکزی کردار کی مضبوط اور غیر متزلزل حمایت جاری رکھے گا۔
It was a pleasure to welcome H.E. Mr. Macky Sall, candidate for the position of UN Secretary-General, to Islamabad today.
During the meeting, I reaffirmed Pakistan’s unwavering commitment to multilateralism, the UN Charter, and a stronger United Nations that advances peace,… pic.twitter.com/N9cHHq5JKb
— Shehbaz Sharif (@CMShehbaz) July 10, 2026
وزیراعظم نے اس امید کا اظہار کیا کہ اقوام متحدہ کی آئندہ قیادت تنظیم کے 3 بنیادی ستونوں، یعنی عالمی امن و سلامتی، پائیدار ترقی اور انسانی حقوق کے فروغ کے لیے متوازن، مؤثر اور غیر جانبدارانہ انداز میں اپنی ذمہ داریاں انجام دے گی۔
شہباز شریف نے اس موقع پر اقوام متحدہ کے منشور کے مقاصد اور اصولوں سے پاکستان کی مستقل وابستگی کا اعادہ کرتے ہوئے کہا کہ سلامتی کونسل کی قراردادوں پر مکمل عمل درآمد، بین الاقوامی قانون اور عالمی معاہدوں کا احترام ہی عالمی امن، سلامتی اور خوشحالی کی مضبوط بنیاد ہے۔
یہ بھی پڑھیں:اقوام متحدہ کے سیکریٹری جنرل کی امیدوار ماریہ فرنینڈا ایسپینوسا کی وزیراعظم سے ملاقات، عالمی امن کے فروغ پر اتفاق
ملاقات کے دوران عالمی اور علاقائی امور پر بھی تبادلہ خیال کیا گیا، جبکہ پاکستان کے اقوام متحدہ کے امن مشنز اور بین الاقوامی تعاون میں کردار پر بھی گفتگو ہوئی۔
اس موقع پر میکی سال نے اقوام متحدہ کے لیے پاکستان کی طویل المدتی خدمات اور کردار کو سراہتے ہوئے عالمی امن کے فروغ کے لیے پاکستان کی جاری تعمیری کوششوں اور قیادت کی تعریف کی۔ انہوں نے کہا کہ پاکستان نے بین الاقوامی امن و استحکام کے لیے ہمیشہ مثبت اور ذمہ دارانہ کردار ادا کیا ہے، جسے عالمی برادری قدر کی نگاہ سے دیکھتی ہے۔
