بھارتی گلوکارہ سنندا شرما نے انکشاف کیا ہے کہ قرآن مجید کی ایک آیت نے محبت، رشتوں اور خود احتسابی کے بارے میں ان کی سوچ پر گہرا اثر ڈالا جسے وہ آج بھی اپنے لیے رہنمائی کا ذریعہ سمجھتی ہیں۔
یہ بھی پڑھیں: بھارتی گلوکارہ کی پاکستانی ہٹ گانے ’میری زندگی ہے تو‘ پر پرفارمنس پر وائرل
جانی تیرا ناں، دوجی وار پیار، مورنی اور پاگل نہیں ہونا جیسے مقبول گانوں سے شہرت حاصل کرنے والی سنندا شرما نے ایک پوڈکاسٹ میں اپنی ایک قریبی مسلمان دوست کے ساتھ ہونے والی گفتگو کا ذکر کرتے ہوئے بتایا کہ اس دوست نے انہیں قرآن مجید کی ایک خوبصورت تعلیم سے آگاہ کیا جس نے ان کے دل پر گہرا اثر چھوڑا۔
سنندا شرما کے مطابق ان کی دوست نے انہیں بتایا کہ اللہ تعالیٰ نے قرآن مجید میں فرمایا ہے کہ ’پاکیزہ عورتیں پاکیزہ مردوں کے لیے ہیں اور پاکیزہ مرد پاکیزہ عورتوں کے لیے ہیں‘۔
انہوں نے کہا کہ ان کے نزدیک اس آیت میں انسانی فطرت اور تعلقات کے بارے میں ایک گہری نفسیاتی حقیقت بھی پوشیدہ ہے یعنی انسان اکثر انہی لوگوں کی طرف متوجہ ہوتا ہے جن کی عادات، رویے اور سوچ اس سے ملتی جلتی ہو۔
گلوکارہ نے وضاحت کی کہ یہاں خامیوں سے ان کی مراد کسی شخص کے کردار یا اخلاقی برائی نہیں بلکہ جذباتی کمزوریاں اور رویوں سے متعلق خصوصیات ہیں۔
مزید پڑھیے: فیکٹ چیک: ڈاکٹر ذاکر نائیک اسٹیج چھوڑ کر کیوں چلے گئے؟
انہوں نے مثال دیتے ہوئے کہا کہ اگر کوئی شخص اپنے شریکِ حیات کے ساتھ وفادار نہ ہو یا اس میں کوئی اور منفی رویہ موجود ہو تو عموماً وہ ایسے ہی مزاج رکھنے والے افراد کو اپنی جانب متوجہ کرتا ہے۔
سنندا شرما کا کہنا تھا کہ حقیقی ہم آہنگی اسی وقت ممکن ہوتی ہے جب دونوں افراد کی اقدار، سوچ اور شخصیت ایک دوسرے سے مطابقت رکھتی ہو۔ ان کے مطابق مختلف اقدار رکھنے والے افراد کے درمیان مضبوط تعلق قائم ہونا نسبتاً مشکل ہوتا ہے جبکہ انسان زیادہ تر انہی لوگوں سے جڑتا ہے جو اس جیسی سوچ اور رویہ رکھتے ہوں۔
مزید پڑھیں: فیلڈ مارشل عاصم منیر شرارتی تھے لیکن انکی پوری توجہ حفظ قران پر مرکوز تھی، مہتمم مدرسہ
انہوں نے مزید کہا کہ وہ اس عمل کو سزا نہیں بلکہ خود کو بہتر بنانے کے سفر کے طور پر دیکھتی ہیں۔ ان کے بقول درست انسان تک پہنچنے سے پہلے زندگی میں مشکلات، آزمائشیں اور دل ٹوٹنے جیسے تجربات پیش آ سکتے ہیں، لیکن یہی تجربات انسان کی شخصیت کو نکھارتے ہیں اور اسے پہلے سے بہتر انسان بنا دیتے ہیں۔
