ایک 33 سالہ سول انجینیئر کی جانب سے اپنے پیشہ ورانہ تجربے اور مشکلات کا اظہار سوشل میڈیا پر وائرل ہو گیا، جس میں اس نے سول انجینئرنگ کو بطور کیریئر منتخب کرنے پر افسوس کا اظہار کیا۔
انجینئر نے ایک سوشل میڈیا پوسٹ میں لکھا کہ کاش اس نے سول انجینیئرنگ کا انتخاب نہ کیا ہوتا یا پھر شروع میں ہی انفارمیشن ٹیکنالوجی کے شعبے میں منتقل ہوجاتا۔
یہ بھی پڑھیں: نوکری کے حصول کے لیے پیشہ ور افراد اپنے سی وی سے تجربہ کیوں کم کررہے ہیں؟
اس نے بتایا کہ سرکاری ملازمت کے امتحانات میں کامیابی نہ ملنے کے بعد اس نے تعمیراتی شعبے میں کام شروع کیا اور ایک سال تک سائٹ پر کام کرنے کے بعد بلڈنگ انفارمیشن ماڈلنگ کے شعبے میں منتقل ہو گیا۔
انجینئر کے مطابق اسے امید تھی کہ دفتر میں کام کرنے سے زندگی اور کام میں توازن بہتر ہوگا، لیکن ایسا نہ ہو سکا۔ اس کا کہنا تھا کہ اب بھی ذہنی دباؤ اور کام کا بوجھ برقرار ہے، فرق صرف اتنا ہے کہ کام ایک ایئر کنڈیشنڈ دفتر میں بیٹھ کر کرنا پڑتا ہے۔
یہ بھی پڑھیں: جرمنی کا پیشہ ورانہ تعلیم کا موقع: پاکستانی طلبہ کیسے اپلائی کر سکتے ہیں؟
اس نے دعویٰ کیا کہ وہ بین الاقوامی منصوبوں پر کام کرتا ہے، لیکن انتظامی دباؤ اور طویل اوقات کار نے مشکلات میں اضافہ کر دیا ہے۔ اس کے مطابق سخت محنت کے باوجود آمدنی زیادہ نہیں اور اب شعبہ تبدیل کرنا مشکل محسوس ہوتا ہے۔
سوشل میڈیا صارفین نے انجینیئر کو مایوس نہ ہونے کا مشورہ دیا۔ بعض افراد نے اسے تدریس، تربیت یا مزید تعلیم کے ذریعے کیریئر تبدیل کرنے کی تجاویز دیں، جبکہ کچھ صارفین نے کہا کہ سول انجینئرنگ میں بھی مستقبل کے بہتر مواقع موجود ہیں۔
