قطر کے سابق امیر شیخ حمد بن خلیفہ آل ثانی 74 برس کی عمر میں انتقال کر گئے۔ وہ 1995 سے 2013 تک قطر کے حکمران رہے اور ان کے دور میں ملک نے عالمی سفارت کاری، توانائی، میڈیا اور کھیلوں کے شعبوں میں غیر معمولی ترقی حاصل کی۔ وزیراعظم شہباز شریف اور نائب وزیراعظم و وزیر خارجہ اسحاق ڈار نے ان کے انتقال پر گہرے دکھ اور افسوس کا اظہار کیا ہے۔
قطر کے سرکاری ادارے امیری دیوان نے اتوار کے روز اعلان کیا کہ ملک کے سابق امیر شیخ حمد بن خلیفہ آل ثانی 74 برس کی عمر میں انتقال کر گئے ہیں۔ وہ 1995 میں اقتدار میں آئے تھے اور 2013 میں رضاکارانہ طور پر اقتدار اپنے صاحبزادے اور موجودہ امیر شیخ تمیم بن حمد آل ثانی کے حوالے کر دیا تھا۔
🚨🇶🇦 𝐅𝐨𝐫𝐦𝐞𝐫 𝐐𝐚𝐭𝐚𝐫 𝐄𝐦𝐢𝐫 𝐒𝐡𝐞𝐢𝐤𝐡 𝐇𝐚𝐦𝐚𝐝 𝐛𝐢𝐧 𝐊𝐡𝐚𝐥𝐢𝐟𝐚 𝐀𝐥 𝐓𝐡𝐚𝐧𝐢 𝐃𝐢𝐞𝐬 𝐚𝐭 𝟕𝟒
Former Emir of Qatar Sheikh Hamad bin Khalifa Al Thani has passed away at the age of 74, the Amiri Diwan announced on July 12, 2026.
Known as the “Father… pic.twitter.com/wA9U6Alqhb
— Rula El Halabi (@Rulaelhalabi) July 12, 2026
شیخ حمد کے دورِ حکومت میں قطر نے دنیا کے سب سے بڑے مائع قدرتی گیس (ایل این جی) برآمد کنندہ ملک کی حیثیت حاصل کی، الجزیرہ نیوز نیٹ ورک کا قیام عمل میں آیا اور 2022 فیفا ورلڈ کپ کی میزبانی حاصل کر کے عالمی سطح پر اپنی شناخت مزید مضبوط کی۔
وزیراعظم شہباز شریف نے سوشل میڈیا پر اپنے تعزیتی پیغام میں شیخ حمد کو دور اندیش رہنما قرار دیتے ہوئے کہا کہ انہوں نے قطر کو جدید، خوشحال اور عالمی سطح پر باوقار ریاست بنانے میں تاریخی کردار ادا کیا۔ انہوں نے امیرِ قطر، شاہی خاندان اور قطری عوام سے دلی ہمدردی کا اظہار کرتے ہوئے مرحوم کے لیے بلندیٔ درجات کی دعا کی۔
نائب وزیراعظم و وزیر خارجہ اسحاق ڈار نے بھی اپنے تعزیتی پیغام میں کہا کہ شیخ حمد نے پاکستان اور قطر کے درمیان تعلقات کو مضبوط بنانے میں اہم کردار ادا کیا، جبکہ علاقائی امن اور ترقی کے لیے ان کی خدمات ہمیشہ یاد رکھی جائیں گی۔
