آزاد جموں و کشمیر پولیس نے اسلام آباد پولیس کے ایک اہلکار پر تشدد کے واقعے کے حوالے سے کہا ہے کہ عوامی حمایت میں واضح کمی اور احتجاج کی بدترین ناکامی کے بعد کالعدم جوائنٹ ایکشن کمیٹی اوچھے ہتھکنڈوں پر اتر آئی ہے۔
مزید پڑھیں: حکومت نے ہمیشہ مذاکرات کا راستہ اپنایا، تشدد ایکشن کمیٹی کی جانب سے کیا گیا، طارق فضل چوہدری
آزاد جموں و کشمیر پولیس کے مطابق 14 جولائی کو راولاکوٹ کے علاقے گوئی نالہ، افسر مارکیٹ میں کالعدم ایکشن کمیٹی سے تعلق رکھنے والے افراد نے اسلام آباد پولیس کے اہلکار احتشام مسیح کو زبردستی گاڑی سے اتار لیا۔
عوامی حمایت میں واضح کمی اوراحتجاج کی بدترین ناکامی کے بعد کالعدم جوائنٹ ایکشن کمیٹی اوچھے ہتھکنڈوں پراترآئی
اسلام آباد پولیس کےملازم پر کالعدم کمیٹی کے شرپسندوں کاتشدد، آزاد جموں وکشمیرپولیس کی پریس ریلیزجاری@KhUsamaIqbal @SdqJaan pic.twitter.com/Mv4z97JXg4— Media Talk (@mediatalk922) July 15, 2026
پولیس کے مطابق کالعدم ایکشن کمیٹی کے افراد نے اسلام آباد پولیس کے اہلکار کو تشدد کا نشانہ بنایا اور واقعے کی گمراہ کن ویڈیو بنا کر سوشل میڈیا پر پھیلا دی۔
آزاد جموں و کشمیر پولیس کے مطابق اسلام آباد پولیس اہلکار پر تشدد کرنے اور ویڈیو بنانے والے افراد کی شناخت کا عمل اور تحقیقات جاری ہیں، جبکہ حقائق کی مکمل تصدیق اور قانونی کارروائی کے بعد واقعے میں ملوث افراد کے خلاف ضابطے کے مطابق کارروائی کی جائے گی۔
پولیس نے واضح کیاکہ کسی بھی شخص یا گروہ کو شرانگیزی، جھوٹی معلومات پھیلانے یا اداروں کے خلاف اشتعال انگیزی کی اجازت نہیں دی جائے گی۔
بیان میں مزید کہا گیا کہ حالیہ کشیدہ صورتحال کے دوران پولیس اور دیگر قانون نافذ کرنے والے اداروں نے انتہائی تحمل اور پیشہ ورانہ ذمہ داری کا مظاہرہ کیا۔ پولیس اہلکاروں کی شہادتوں اور زخمی ہونے کے واقعات کے باوجود شہریوں کے جان و مال کا تحفظ یقینی بنایا گیا۔
آزاد جموں و کشمیر پولیس نے عوام سے اپیل کی کہ وہ غیر مصدقہ اور ایڈٹ شدہ ویڈیوز یا معلومات شیئر نہ کریں اور کسی بھی مشکوک سرگرمی سے متعلق فوری طور پر پولیس کو آگاہ کریں۔
