امریکی ریاست الاباما میں ایک ہرن شیشے کی سامنے والی کھڑکی توڑ کر قدیم نوادرات کی دکان میں گھس آیا، جس کے نتیجے میں دکان اور سامان کو نقصان پہنچا، تاہم خوش قسمتی سے کوئی شخص یا ہرن زخمی نہیں ہوا۔
غیر ملکی میڈیا کے مطابق یہ واقعہ منگل کی دوپہر مقامی وقت کے مطابق 12 بج کر 42 منٹ پر شہر ڈوتھن میں واقع بلو ڈیزی اینٹیک نامی دکان میں پیش آیا۔ دکان انتظامیہ نے واقعے کے بعد کی تصاویر سوشل میڈیا پر شیئر کیں، جن میں ٹوٹا ہوا شیشہ اور بکھرا ہوا سامان دیکھا جا سکتا ہے۔
دکان کی مالک میری کے فلائیڈ نے بتایا کہ ہرن اندر داخل ہونے کے بعد قدیم نوادرات کے ایک اسٹال کو بری طرح نقصان پہنچایا۔ اسی دوران ایک حاضر دماغ ملازم نے دکان کا دروازہ کھول دیا، جس کے ذریعے ہرن باہر نکل گیا۔
انہوں نے بتایا کہ اگرچہ دکان اور نوادرات کو نقصان پہنچا، تاہم کسی گاہک، ملازم یا ہرن کو کوئی چوٹ نہیں آئی۔
واقعے کے باوجود دکان معمول کے مطابق کھلی رہی، تاہم احتیاطی طور پر گاہکوں کو مرکزی دروازے کے بجائے دوسرے راستے سے اندر آنے کی ہدایت کی گئی۔
