سیلانی ویلفیئر انٹرنیشنل ٹرسٹ کے بانی و چیئرمین مولانا محمد بشیر فاروق قادری نے کرپٹو کرنسی کو شرعی طور پر جائز قرار دیتے ہوئے کہا ہے کہ اس ضمن میں وہ 13 ماہ قبل فتویٰ جاری کرچکے ہیں۔
کرپٹو کرنسی سے متعلق حالیہ میڈیا رپورٹس کے بعد سیلانی ہیڈ آفس کراچی میں مولانا بشیر فاروق قادری کی زیرصدارت منعقدہ ایک ہنگامی اجلاس میں بلاک چین ٹیکنالوجی کے ماہرین اور رئیس المفتی مفتی وسیم اختر المدنی سمیت دیگر متعلقہ شخصیات نے شرکت کی۔
یہ بھی پڑھیں: کرپٹو کرنسی کے ذریعے خرید و فروخت شرعاً جائز نہیں، مفتی تقی عثمانی کا فتویٰ
اجلاس کے دوران کرپٹو کرنسی کے شرعی اور قانونی پہلوؤں پر تفصیلی غور کیا گیا اور اس کے جائز یا ناجائز ہونے سے متعلق مختلف آرا کا ازسرِ نو جائزہ لیا گیا۔
اس موقع پر مولانا بشیر فاروق قادری نے کہا کہ کرپٹو کرنسی کے جواز سے متعلق فتویٰ 13 ماہ قبل جاری کرکے اسلامی نظریاتی کونسل، اسٹیٹ بینک اور متعلقہ وزارت کو بھی ارسال کردیا گیا تھا۔
مزید پڑھیں: بلال بن ثاقب کی مفتی تقی عثمانی سے اہم ملاقات، ڈیجیٹل اثاثوں کی شرعی حیثیت پر تبادلہ خیال
انہوں نے کہا کہ سیلانی ویلفیئر ریاستی پالیسی کے ساتھ کھڑی ہے اور یہ حقیقت ہے کہ دنیا کے متعدد ممالک کرپٹو کرنسی کے ذریعے لین دین کر رہے ہیں۔
’۔۔۔ لہٰذا اس شعبے میں پیش رفت کو موجودہ عالمی تناظر میں دیکھا جانا چاہیے۔‘
