ترکش ایئر کی استنبول سے اسلام آباد آنے والی پرواز آذربائیجان کی فضائی حدود میں فنی خرابی کا شکار ہوگئی، جس پر پائلٹ نے ایمرجنسی نافذ کرتے ہوئے طیارے کو بحفاظت باکو ایئرپورٹ پر اتار لیا۔ مسافروں کو ٹرمینل منتقل کر دیا گیا جبکہ طیارے کی جانچ اور مرمت کا عمل شروع کر دیا گیا۔
ترکش ایئر کی استنبول سے اسلام آباد آنے والی پرواز آذربائیجان کی فضائی حدود میں فنی خرابی کے باعث باکو ایئرپورٹ پر ہنگامی لینڈنگ کرنے پر مجبور ہوگئی۔
میڈیا رپورٹس کے مطابق ترکش ایئر کی پرواز TK-710 استنبول سے اسلام آباد آ رہی تھی کہ دورانِ پرواز آذربائیجان کی فضائی حدود میں طیارے کو تکنیکی مسئلے کا سامنا کرنا پڑا۔
TK710, Istanbul-Islamabad, has just diverted to Baku after squawking 7700. The aircraft is now taxiing toward the terminal area after a safe landing.https://t.co/pLP8TmxRQW pic.twitter.com/qyeinL5jgH
— Flightradar24 (@flightradar24) July 16, 2026
ایوی ایشن ذرائع کا کہنا ہے کہ فلائٹ ریڈار 24 کے مطابق طیارے کو گلوبل نیوی گیشن سیٹلائٹ سسٹم (جی این ایس ایس) کے سگنلز کی فراہمی میں خلل آیا، جس کے بعد پائلٹ نے احتیاطی اقدام کے طور پر ایمرجنسی ڈیکلیئر کر دی۔
ذرائع کے مطابق ایئر ٹریفک کنٹرول (اے ٹی سی) کی ہدایت پر ایئربس A330 طیارے کو آذربائیجان کے دارالحکومت باکو کے حیدر علییف انٹرنیشنل ایئرپورٹ پر بحفاظت اتار لیا گیا۔
یہ بھی پڑھیں:بحیرۂ عرب میں امریکی بحریہ کا ہیلی کاپٹر ہنگامی لینڈنگ پر مجبور، ایک اہلکار لاپتا، 3 زخمی
لینڈنگ کے بعد تمام مسافروں کو بحفاظت طیارے سے اتار کر ایئرپورٹ ٹرمینل منتقل کر دیا گیا، جبکہ انجینئرنگ ٹیم نے طیارے کی جانچ اور خرابی دور کرنے کا کام شروع کر دیا ہے۔
واضح رہے کہ مذکورہ پرواز کو پاکستانی وقت کے مطابق سہ پہر 3 بج کر 35 منٹ پر اسلام آباد انٹرنیشنل ایئرپورٹ پہنچنا تھا، تاہم فنی خرابی کے باعث پرواز میں تاخیر ہوگئی۔
