انقلابی اقدامات سے ملک ڈیفالٹ سے ترقی کی راہ پرگامزن ہوا، وزیراعظم کی طلبا سے خصوصی نشست

وزیرِ اعظم محمد شہباز شریف سے “اُڑان اوورسیز پاکستان سمر اسکالرز پروگرام” کے تحت دنیا کی ممتاز جامعات میں زیرِ تعلیم پاکستانی طلبہ نے ملاقات کی ہے۔

یہ اسکالرز وزارتِ منصوبہ بندی و ترقیات کے تحت پاکستان کو درپیش مختلف مسائل پر تحقیق کے لیے 6 ہفتوں کی انٹرن شپ کر رہے ہیں۔

وزیرِ اعظم نے سمندر پار پاکستانی طلبہ کے ملک میں انٹرنشپ کرنے کے فیصلے کا خیرمقدم کرتے ہوئے کہا کہ قومی ترقی میں نوجوانوں کا کردار کلیدی ہے اور پوری دنیا میں آج پاکستانی طلبا و طالبات ملک کا نام روشن کر رہے ہیں۔

یہ بھی پڑھیں:تمام کشمیری پاکستانی اور تمام پاکستانی کشمیری ہیں، اوورسیز کشمیری رہنماؤں کی پارلیمنٹ آمد پر گفتگو

ملاقات کے دوران وزیرِ اعظم نے اسکالرز کو حکومت کے اصلاحاتی ایجنڈے پر تفصیلی بریفنگ دی اور ان کے سوالات کے جوابات دیے۔

اس موقع پر وفاقی وزرا احسن اقبال، عطا اللہ تارڑ، علی پرویز ملک، وزرائے مملکت بلال اظہر کیانی، وجیحہ قمر اور اعلیٰ حکام بھی موجود تھے۔

ماضی کا ڈیفالٹ کا خطرہ اور موجودہ معاشی اصلاحات کا ایجنڈا

وزیرِ اعظم نے معاشی صورتحال پر روشنی ڈالتے ہوئے کہا کہ ماضی میں جب ملک ڈیفالٹ کے دہانے پر پہنچ چکا تھا، تب ہنگامی معاشی اصلاحات کے ذریعے ہی استحکام کا حصول ممکن ہوا۔

انہوں نے جامع اصلاحات کا ذکر کرتے ہوئے بتایا کہ ان میں فیڈرل بورڈ آف ریونیو (ایف بی آر ) کی ڈیجیٹائزیشن، محاصل میں اضافہ، کاروبار میں آسانی، پیداواری صلاحیت میں اضافہ، زرعی شعبے کی ترقی، نوجوانوں کو بااختیار بنانا اور قابل تجدید توانائی کا فروغ شامل ہیں۔

وزیراعظم نے وفاقی بورڈ آف ریونیو کی کارکردگی کا خصوصی ذکر کرتے ہوئے بتایا کہ ’مؤثر انفورسمنٹ اقدامات کے نتیجے میں گزشتہ مالی سال کے دوران ایف بی آر نے 800 ارب روپے سے زیادہ کے اضافی محصولات جمع کیے ہیں۔‘

مزید پڑھیں:اٹلی: ’میری فوج، میرا پاکستان‘ کنونشن، اوورسیز پاکستانیوں کا پاک فوج کے ساتھ اظہار یکجہتی

انہوں نے واضح کیا کہ حکومت کی ان تمام معاشی اصلاحات کا بنیادی مقصد ایک مضبوط، خود کفیل اور برآمدات پر مبنی معیشت کی بنیاد رکھنا ہے۔

بھارت کے خلاف مئی 2025 کی تاریخی فتح اور خطے کی صورتحال

دفاعی اور سفارتی محاذ پر بات کرتے ہوئے وزیرِ اعظم محمد شہباز شریف نے ایک بڑا بیان دیا کہ فیلڈ مارشل جنرل سید عاصم منیر کی قیادت اور قوم کی بھرپور حمایت کی بدولت پاکستان نے مئی 2025 میں بھارت کو شکست دی۔ انہوں نے اس عزم کا اعادہ کیا کہ ملک کا دفاع اور خودداری ہمیشہ اول ترجیح رہے گی۔

امریکا ایران جنگ رکوانے میں پاکستان کا ثالثی کردار اور ‘اسلام آباد مفاہمتی یادداشت’

وزیرِ اعظم نے پاکستان کی حالیہ سفارتی کامیابیوں کو دنیا کے سامنے رکھتے ہوئے کہا کہ امریکا اور ایران کے درمیان جاری جنگ رکوانے میں پاکستان کا ثالثی کا کردار ملکی سفارتی تاریخ کا ایک نمایاں باب ہے۔

یہ بھی پڑھیں:سعودی عرب میں پاکستانی سفیر کا اوورسیز کمیونٹی کو صبر و تحمل کا پیغام

انہوں نے اسکالرز کو بتایا کہ پاکستان کی ان انتھک سفارتی کاؤشوں کے نتیجے میں ہی ’اسلام آباد مفاہمتی یادداشت‘  طے پائی ہے، جو عالمی امن کے قیام کے لیے ایک انتہائی اہم اور بڑی پیش رفت ہے۔

نوجوانوں کے خیالات کا اظہار اور وزیرِ اعظم کا پیغام

ملاقات کے دوران اسکالرز اور طلبا و طالبات نے پاکستان کے مختلف شعبوں میں بہتری اور ترقی کے حوالے سے اپنے اختراعی خیالات کا اظہار کیا۔

وزیرِ اعظم نے نوجوانوں کے جوش و جذبے کو سراہتے ہوئے ان پر زور دیا کہ وہ اپنی تعلیم، تحقیق اور عالمی تجربے کو پاکستان کی ترقی، خوشحالی اور روشن مستقبل کے لیے بروئے کار لائیں۔