وزارت مذہبی امور نے حج 2027 سے 2030 تک کے عازمین حج کے لیے جاری رجسٹریشن مہم سے متعلق تازہ اعداد و شمار جاری کر دیے ہیں، جن کے مطابق گھر بیٹھے آن لائن رجسٹریشن کروانے والے عازمین کی تعداد 3 لاکھ 40 ہزار سے تجاوز کر گئی ہے۔
وزارت کے مطابق رجسٹرڈ درخواست گزاروں میں سے 2 لاکھ 46 ہزار عازمین نے سرکاری حج اسکیم جبکہ 94 ہزار افراد نے پرائیویٹ حج اسکیم کا انتخاب کیا ہے۔
صوبائی سطح پر جاری اعداد و شمار کے مطابق پنجاب سے سب سے زیادہ ایک لاکھ 56 ہزار عازمین نے رجسٹریشن کرائی ہے، جبکہ سندھ سے ایک لاکھ، خیبرپختونخوا سے 51 ہزار، اسلام آباد سے 15 ہزار، بلوچستان سے 12 ہزار، آزاد جموں و کشمیر سے 2 ہزار 600 اور گلگت بلتستان سے ایک ہزار 200 افراد رجسٹرڈ ہو چکے ہیں۔
وزارتِ مذہبی امور کے ترجمان نے بتایا کہ حج واجبات کی آن لائن وصولی کا باضابطہ اعلان جلد متوقع ہے، جس کے بعد رجسٹرڈ عازمین مقررہ طریقہ کار کے مطابق اپنی ادائیگیاں کر سکیں گے۔
ترجمان نے رجسٹرڈ عازمین کو ہدایت کی ہے کہ کسی بھی قسم کی معلومات، رہنمائی یا معاونت کے لیے ’پاک حج‘ ایپ یا وزارت کی حج ہیلپ لائنز سے رابطہ کریں۔
وزارت نے درخواست گزاروں پر زور دیا ہے کہ رجسٹریشن کے دوران فراہم کیے گئے تمام کوائف کی درستگی کو یقینی بنائیں، جبکہ گروپ رجسٹریشن کی صورت میں صرف خاندان کے افراد کو ہی ایک گروپ میں شامل کیا جائے تاکہ بعد ازاں کسی قسم کی دشواری کا سامنا نہ کرنا پڑے۔
