کینیڈا کی وزیر خارجہ انیتا آنند نائب وزیراعظم و وزیر خارجہ اسحاق ڈار کی دعوت پر پاکستان کے سرکاری دورہ پر اسلام آباد پہنچ گئیں۔ نائب وزیراعظم اور وزیر خارجہ اسحاق ڈار نے ان کا استقبال کیا۔ اپنے عہدہ سنبھالنے کے بعد پاکستان کا یہ ان کا پہلا دورہ ہے، جس میں دونوں ممالک کے درمیان تجارت، سرمایہ کاری، تعلیم، عوامی روابط اور علاقائی و عالمی امور پر تفصیلی مذاکرات کیے جائیں گے۔
ترجمان دفتر خارجہ کی جانب سے جاری بیان کے مطابق دورے کے دوران نائب وزیراعظم و وزیر خارجہ اسحاق ڈار اور کینیڈین وزیر خارجہ انیتا آنند کے درمیان وفود کی سطح پر مذاکرات ہوں گے، جن میں پاکستان اور کینیڈا کے دوطرفہ تعلقات کے تمام اہم پہلوؤں کا جائزہ لیا جائے گا۔
یہ بھی پڑھیے کینیڈا کا امریکا ایران مفاہمت میں پاکستان کے کردار کا اعتراف
بیان کے مطابق دونوں رہنما تجارت اور سرمایہ کاری، تعلیم، عوامی روابط (پیپل ٹو پیپل کانٹیکٹس) اور باہمی تعاون کے دیگر شعبوں میں تعاون کو مزید فروغ دینے کے طریقہ کار پر تبادلہ خیال کریں گے۔ اس کے علاوہ علاقائی اور عالمی سطح پر مشترکہ دلچسپی کے امور پر بھی دونوں ممالک کے مؤقف اور آرا کا تبادلہ کیا جائے گا۔
دفتر خارجہ کے مطابق کینیڈا کی وزیر خارجہ اپنے دورۂ پاکستان کے دوران ملک کی اعلیٰ سیاسی قیادت سے بھی ملاقاتیں کریں گی۔
بیان میں کہا گیا ہے کہ پاکستان اور کینیڈا کے درمیان دوستانہ دوطرفہ تعلقات قائم ہیں، جن کی بنیاد دونوں ممالک کے عوام کے درمیان مضبوط روابط ہیں۔ کینیڈا میں مقیم متحرک پاکستانی کمیونٹی بھی ان تعلقات کو مزید مستحکم بنانے میں اہم کردار ادا کر رہی ہے۔
یہ بھی پڑھیے پاکستان اور کینیڈا کے درمیان سفارتی رابطہ، امن و استحکام پر تبادلۂ خیال
دفتر خارجہ کے مطابق کینیڈا کی وزیر خارجہ کا یہ دورہ دونوں ممالک کے اس مشترکہ عزم کا مظہر ہے کہ باہمی تعاون کو مزید وسعت دی جائے اور دوطرفہ تعلقات کو نئی جہت دی جائے۔
