اٹلی میں نوجوانوں کے جرائم کے خلاف ملک گیر آپریشن کے دوران پولیس نے 539 افراد کو گرفتار کرلیا، جبکہ تقریباً ایک ہزار افراد کے خلاف مقدمات درج کیے گئے ہیں۔
خبر رساں ادارے کے مطابق یہ کارروائی اٹلی کے 44 صوبوں میں سینٹرل آپریشنز سروس کی نگرانی میں کی گئی، جس کے دوران 954 افراد کو الزامات کا سامنا ہے۔ گرفتار افراد میں 47 کم عمر نوجوان بھی شامل ہیں۔
یہ بھی پڑھیں: ایک سال میں کتنے تارکین وطن بحیرہ روم کے پار اسمگل کیے گئے؟
پولیس نے کارروائی کے دوران 973 ایسے سوشل میڈیا اکاؤنٹس کی نشاندہی کی جو نفرت انگیز مواد، تشدد، قانون نافذ کرنے والے اداروں پر حملوں اور اسلحے کے استعمال کو فروغ دے رہے تھے۔ ان میں سے دو اکاؤنٹس کو ممکنہ بندش کے لیے عدالتی حکام کے حوالے کر دیا گیا۔
آپریشن کے دوران پولیس نے تقریباً ایک لاکھ 88 ہزار افراد کی جانچ کی، جن میں 19 ہزار سے زائد کم عمر افراد شامل تھے۔ کارروائی خاص طور پر ان علاقوں میں کی گئی جہاں منشیات فروشی اور رات کے اوقات میں جرائم کی سرگرمیاں زیادہ پائی جاتی ہیں۔
پولیس نے چھاپوں کے دوران 700 کلوگرام سے زائد منشیات برآمد کیں، جن میں 41 کلوگرام کوکین، 660 کلوگرام کینابِس، 2 کلوگرام کیٹامائن، ایک ہزار سے زائد آکسی کوڈون گولیاں اور دیگر ممنوعہ منشیات شامل ہیں۔
یہ بھی پڑھیں: اٹلی میں 4 پاکستانی مزدوروں کے قتل کا معمہ حل، 2 پاکستانی گرفتار
کارروائی کے دوران ایک ہزار 182 مقامات کی تلاشی لی گئی، جن میں غیر سرپرست غیر ملکی کم عمر افراد کے لیے 24 مراکز، 117 تفریحی مقامات، 543 تجارتی ادارے اور مختلف عوامی مقامات شامل تھے۔
پولیس نے 3 لاکھ 7 ہزار یورو سے زائد نقد رقم، 49 آتشیں ہتھیار، گولیاں، 87 تیز دھار ہتھیار اور دیگر خطرناک اشیا بھی قبضے میں لے لیں۔
حکام کے مطابق کارروائی کے دوران مبینہ طور پر چوری شدہ سامان، جن میں سونے کے ہار اور موبائل فون شامل تھے، بھی برآمد کیے گئے، جبکہ منشیات کے استعمال اور کم عمر افراد کو شراب فروخت کرنے پر 506 انتظامی جرمانے عائد کیے گئے۔
