آزاد جموں و کشمیر میں عام انتخابات کے سلسلے میں الیکشن ڈیوٹی پر مامور سرکاری ملازمین کے لیے پولنگ کا مرحلہ کامیابی کے ساتھ مکمل کر لیا گیا، جس میں 24 ہزار 40 ملازمین نے اپنا حقِ رائے دہی استعمال کیا۔
سرکاری ملازمین کے لیے پولنگ کا عمل 20 جولائی کو صبح 8 بجے سے شام 5 بجے تک آزاد کشمیر کے مختلف اضلاع میں پرامن ماحول میں جاری رہا۔
پولنگ کے دوران سیکیورٹی اور انتخابی انتظامات کو مؤثر قرار دیا گیا۔
یہ بھی پڑھیں: پولنگ عملے کی ووٹنگ سے آزاد کشمیر میں انتخابات ملتوی ہونے کے خدشات ختم، نواز شریف انتخابی دنگل سجانے کو تیار
اعداد و شمار کے مطابق آزاد کشمیر کی 3 ڈویژنز کے 8 اضلاع میں مجموعی طور پر 24 ہزار 40 ووٹ کاسٹ کیے گئے۔
راولاکوٹ ڈویژن کے 2 اضلاع کی 4 قانون ساز اسمبلی نشستوں پر 4 ہزار 278 سرکاری ملازمین نے ووٹ ڈالے، جبکہ میرپور ڈویژن کے 3 اضلاع کی 13 قانون ساز اسمبلی نشستوں پر 12 ہزار 41 ملازمین نے حقِ رائے دہی استعمال کیا۔
اسی طرح مظفرآباد ڈویژن کے 3 اضلاع کی 9 قانون ساز اسمبلی نشستوں پر 7 ہزار 721 ووٹ کاسٹ کیے گئے۔
پولنگ کے اختتام پر تمام سیل شدہ بیلٹ باکسز اور دیگر انتخابی سامان مقررہ ضابطہ کار کے مطابق متعلقہ ریٹرننگ افسران کے حوالے کر دیا گیا۔
ان ووٹوں کی گنتی اور سرکاری نتائج کا اعلان عام انتخابات کے لیے مقررہ پولنگ کے روز دیگر ووٹوں کے ساتھ کیا جائے گا۔
پولنگ کے موقع پر مختلف حلقوں میں سیاسی جماعتوں کے کارکنوں نے انتخابی کیمپ بھی قائم کیے، جہاں ووٹرز کی رہنمائی اور انتخابی سرگرمیاں جاری رہیں۔
مزید پڑھیں: آزاد کشمیر میں ن لیگ حکومت بنانے جارہی ہے، وزیراعظم کا فیصلہ نواز شریف کریں گے، محمد حنیف ملک
انتخابی امور کے ماہرین کا کہنا ہے کہ انتخابی عمل کے پہلے مرحلے کا کامیابی اور پرامن انداز میں مکمل ہونا آزاد جموں و کشمیر میں منظم، شفاف اور آزادانہ عام انتخابات کے انعقاد کی جانب ایک مثبت پیش رفت ہے۔
ان کے مطابق سرکاری ملازمین کی جانب سے ہزاروں کی تعداد میں ووٹ کاسٹ کیا جانا انتخابی نظام پر اعتماد اور انتخابی عمل میں بھرپور شرکت کی عکاسی کرتا ہے۔
