متحدہ مدارس کونسل پاکستان نے جمعیت علمائے اسلام (جے یو آئی) کے سربراہ مولانا فضل الرحمان سے منسوب حالیہ متنازع بیانات سے لاتعلقی کا اظہار کرتے ہوئے واضح کیا ہے کہ پاک فوج اور شہداءِ وطن کے خلاف کسی بھی توہین آمیز بیان سے دینی مدارس، دینی وفاقات اور تعلیمی بورڈز کا کوئی تعلق نہیں۔
متحدہ مدارس کونسل پاکستان کے ترجمان ڈاکٹر محمد اصغر قادری کی جانب سے جاری اعلامیے میں کہا گیا ہے کہ پاکستان کے تمام دینی وفاق، مدارس اور بورڈز کے مشترکہ پلیٹ فارم ’متحدہ مدارس کونسل پاکستان‘ کی مجلسِ عاملہ کے امیر مولانا فضل الرحمان کی جانب سے پاک فوج اور شہداء کے حوالے سے دیے گئے بیانات سے کونسل کا کوئی تعلق نہیں۔
اعلامیے میں کہا گیا ہے کہ دینی مدارس، علما، مشائخ اور طلبا افواجِ پاکستان اور شہداءِ وطن کی عظیم قربانیوں کو قدر کی نگاہ سے دیکھتے ہیں۔ دینی مدارس کے نظریاتی، فکری اور جغرافیائی سرحدوں کے تحفظ، امن، اعتدال، اتحاد اور قومی استحکام کے لیے کردار کو بھی اجاگر کیا گیا۔
پشاور: مولانا فضل الرحمان کا بیان افسوس ناک ہے، گورنر فیصل کریم کنڈی
شہدا کے معاملے پر ایسا بیان ایک غیر ذمہ دارانہ عمل ہے، گورنر فیصل کریم کنڈی
ذمہ دار لیڈر کو شہدا کے بارے میں ایسی بات نہیں کرنی چاہئیے، گورنر@KulAalam @juipakofficial pic.twitter.com/h664BhHddY— Media Talk (@mediatalk922) July 15, 2026
ترجمان نے کہا کہ پاک فوج اور سیکیورٹی ادارے دہشتگردی کے خلاف پوری قوم کے لیے فرنٹ لائن پر خدمات انجام دے رہے ہیں، جبکہ شہداء کی قربانیاں آئندہ نسلوں کے لیے سرمایۂ افتخار ہیں، اس لیے ان کے خلاف کسی بھی قسم کے منفی بیانات قابل قبول نہیں۔
مزید پڑھیں:شہدا کی تضحیک ناقابلِ قبول، مولانا فضل الرحمان قوم سے معافی مانگیں، اسپیکر پنجاب اسمبلی ملک احمد خان
متحدہ مدارس کونسل نے واضح کیا کہ اگر مولانا فضل الرحمان نے یہ مؤقف کسی سیاسی جماعت کی نمائندگی کرتے ہوئے اختیار کیا ہے تو وہ ان کا ذاتی اور سیاسی مؤقف ہے، جس کی دینی وفاقات، مدارس اور متحدہ مدارس کونسل پاکستان تائید نہیں کرتی۔
اعلامیے میں تمام دینی وفاقوں، مدارس، اساتذہ اور طلبا سے اپیل کی گئی ہے کہ وہ قومی یکجہتی، امن اور استحکام کے فروغ کے لیے اپنا مثبت کردار جاری رکھیں اور افواجِ پاکستان اور شہداءِ وطن کی خدمات و قربانیوں کو ہمیشہ قدر کی نگاہ سے دیکھیں۔
