ہالی ووڈ کی مشہور فلمی سیریز گاڈزیلا میں جیا کا کردار ادا کرنے والی نوجوان اداکارہ کیلی ہوٹل 18 برس کی عمر میں ٹریفک حادثے میں انتقال کر گئی ہیں۔
امریکی میڈیا رپورٹس کے مطابق کیلی ہوٹل ریاست میری لینڈ میں پیش آنے والے ایک کار حادثے میں جان کی بازی ہار گئیں۔ ان کے والد جوشوا ہوٹل نے ان کے انتقال کی تصدیق کی جبکہ Texas School for the Deaf نے بھی سوشل میڈیا پر جاری بیان میں اس افسوسناک خبر کی توثیق کی۔
یہ بھی پڑھیں: انگلینڈ کے فٹبال لیجنڈ کیون کیگن 75 برس کی عمر میں انتقال کرگئے
اسکول کی جانب سے جاری بیان میں کہا گیا کہ کیلی ہوٹل کی اچانک وفات پر ادارہ گہرے رنج و غم میں مبتلا ہے۔ بیان میں اہلِ خانہ، دوستوں اور ساتھی طلبہ سے تعزیت کا اظہار کرتے ہوئے عوام سے اپیل کی گئی کہ حادثے کی وجوہات سے متعلق غیر مصدقہ اطلاعات یا قیاس آرائیوں سے گریز کیا جائے اور خاندان کی نجی زندگی کا احترام کیا جائے۔
کیلی ہوٹل نے 2021 میں ریلیز ہونے والی فلم Godzilla vs. Kong میں جیا نامی ایک بہری یتیم بچی کا کردار ادا کرکے عالمی شہرت حاصل کی۔ فلم میں ان کے کردار اور دیوہیکل بندر کونگ کے درمیان جذباتی تعلق کو شائقین نے بے حد پسند کیا۔
یہ بھی پڑھیں: جراسک پارک کے معروف اداکار سیم نیل 78 برس کی عمر میں انتقال کر گئے
2021 میں کو دیے گئے ایک انٹرویو میں کیلی نے بتایا تھا کہ بولے جانے والے مکالموں کو امریکی اشاروں کی زبان (ASL) میں منتقل کرنا ان کے لیے سب سے بڑا چیلنج تھا۔
انہوں نے کہا کہ ’مجھے اسکرپٹ یاد کرنے اور اپنے مکالموں کو اشاروں کی زبان میں ادا کرنے میں کوئی مشکل نہیں ہوئی لیکن اصل مشکل بولے جانے والے جملوں کو ASL میں منتقل کرنا تھی کیونکہ اس زبان میں جملوں کی ساخت مختلف ہوتی ہے۔ بعض اوقات پروڈیوسر اور ہدایت کار کہتے تھے کہ یہ درست نہیں حالانکہ مترجم میرے اشاروں کا درست مفہوم بیان کر رہا ہوتا تھا۔ ایک موقع پر ASL کے ترجمے کے حوالے سے غلط فہمی پیدا ہوئی جس سے شوٹنگ میں تاخیر ہوئی لیکن بعد میں وہ ہماری بات سمجھ گئے‘۔”
یہ بھی پڑھیں: امریکا میں اسکائی ڈائیونگ طیارہ حادثہ، ابتدائی رپورٹ کیا کہتی ہے؟
انہوں نے 2024 میں ریلیز ہونے والی فلم Godzilla x Kong: The New Empire میں بھی یہی کردار نبھایا جس پر انہیں Saturn Awards میں بہترین نوجوان اداکارہ کی نامزدگی بھی ملی۔
کیلی ہوٹل کا تعلق کئی نسلوں پر مشتمل ایک ایسے خاندان سے تھا جہاں افراد سماعت سے محروم تھے۔ 2021 میں ایک انٹرویو کے دوران انہوں نے بتایا تھا کہ فلم کے مکالموں کو امریکی اشاروں کی زبان (ASL) میں ڈھالنا ان کے لیے ایک بڑا چیلنج تھا، تاہم انہوں نے اپنی محنت اور صلاحیت سے اس کردار کو حقیقت کے قریب پیش کیا۔
کیلی ہوٹل کی اچانک وفات پر مداحوں، ساتھی فنکاروں اور فلمی حلقوں نے گہرے دکھ اور افسوس کا اظہار کرتے ہوئے انہیں خراجِ عقیدت پیش کیا۔
